Etnoaýyl qalashyǵy 2500 sharshy metr aýmaqty qamtyǵan 30-dan astam sáýletine sáni jarysqan kıiz úılerden quralypty. Bir sózben aıtqanda, samaladaı samsaǵan aqboz úıler baıyrǵy kóshpendi qazaqtyń bozdalada bozjýsandy qýalap erkin ósken ómirinen eles beredi. Kórmege kelgen sheteldik hám otandyq qonaqtar áýeli qalashyqty qorshaǵan kóne shahardyń qamaly ispettes qabyrǵalardy tamashalaı jaǵalap, ortadaǵy qaqpadan ishke enedi. Alǵashqy 11 úı – sheberler qalashyǵy. Munda aq kúmisti qaqtaǵan aıtýly sheberler qalbyr-qaptaly buqara bylǵarysymen syrylǵan er-turmandy áshekeılep, júzik-syrǵa sekildi sándik buıymdardy árleý isimen aınalysyp jatyr... Sonymen qatar, teriden jasalǵan kónekter men aǵashtan oıylǵan ydys-aıaq, tútilgen júnnen boıap basylǵan shaǵyn tekemetterge kóz sýara alasyz... Qanat keregesi japsarlasa jartylaı ashyq tigilgen úılerde aýyspaly saýda-sattyq ótse, 850 oryndyq etnomıýzıkl zalynda 93 kún boıy kún saıyn konsert qoıylady. Tamashalaý tegin. Etnoaýyldyń qaq ortasynda ornalasqan kishi sáýlettik nysandarda – qarapaıym fýnksııalardan quralǵan landshafty sáýlet týyndylary jáne kórkemdik-dekoratıvtik elementter kompozısııasy boı kóterse, dástúrli ańshylyq sektorynda – salbýryn qurýǵa arnalǵan saıat qustary men júırik tazylardyń túrlerin, sondaı-aq arnaıy jasaqtalǵan orynda jamby atý men asyq atý ónerin tamashalaýǵa, tipti ózińiz de saıysqa qatysýǵa tolyq múmkindigińiz bar. Qalashyqqa at basyn burǵan qonaqtar kórkem bezendirilgen ári qyzmet kórsetý servısi zamanaýı úlgimen jaraqtalǵan ulttyq ashana ortalyǵyna bas suǵady. Munda qazaqtyń baıyrǵy ulttyq taǵamdarymen qatar qymyz, shubat, qymyran, aıran-shalap sııaqty sýsyndar da qonaq kádesine jarap jatyr. Osyndaǵy etnoaýyl ornalasqan atshabarda biz sóz etip otyrǵan halyqtyq qundylyqtarmen qatar ulttyq sport túrlerinen de oıyndar ótkizý josparlanǵan eken. Munda atqarylýǵa tıis is-sharalardy naqtylaı túsý úshin Mádenıet jáne sport mınıstrligi Sport jáne deneshynyqtyrý isteri komıtetiniń tóraǵasy Elsııar Qanaǵatov myrzany sózge tarttyq. – EKSPO kórmesine baılanysty josparlanǵan sporttyq sharalardyń betasharyn ulttyq sport oıyndarymen ashqaly otyrmyz. Atap aıtar bolsaq, 11 maýsym kúni osy «Qazanat» atshabarynda Qazaqstan Respýblıkasy Prezıdentiniń júldesine arnalǵan báıge túrlerinen báseke ótedi. Sharanyń ashylý saltanatyna daıyndyq júrip jatyr. – О́zińiz aıtqandaı, daıyndyq sharasy jaıly naqtylaı tússeńiz? − Sheteldik qonaqtar men ózimizdiń kórermendi ulttyq sport túrleriniń saltanatymen tanystyrý úshin alaman sherý ótkizý josparda tur. Mundaǵy basty erekshelik – sherýge qatysatyn barlyq sportshylar ulttyq úlgide kıindiriledi jáne olardyń attary da kórkem kejimdelip, árbir sport túrine saı naqyshpen aıshyqtalady. Odan keıin 25, 15, 7, 1,8 jáne 2,4 shaqyrymdyq qashyqtyqqa ártúrli jastaǵy júırikter saıyssa, 7 shaqyrymǵa jorǵalar jarysy ótedi. Jarys jeńimpazdaryna taǵaıyndalǵan júlde qoryna Almaty oblysy ákimdigi men «Samuryq-Qazyna» ulttyq ál-aýqat qory demeýshilik jasap otyr. – Joǵarydaǵy báıge túrlerine qatysatyn júırikterdi tańdaý qalaı júrgizildi, jarysqa barlyq óńirdiń tulparlary qatysatyn bolar? – О́zderińiz kórip otyrǵandaı, atshabardyń aınalym kólemi óte tar. Sol sebepti, júırikterge de shekteý qoıyldy. Iаǵnı 25 shaqyrymdyq alaman báıgege ár oblystan 2 tulpar tańdalyp alyndy. Bizdegi aldyn ala daıyndalǵan málimet boıynsha alaman báıgege – 33, top báıgege – 35, qunan jarysqa – 35, jorǵa jarysqa 23 júırik qatysady dep kútilýde. Júırikterdi irikteý isin Ulttyq sport túrleri qaýymdastyǵy men jergilikti oblystyq basqarmalar atqardy. Bulardyń syrtynda 1,8 jáne 2,4 shaqyrymdyq ushqyr jylqylar saıysyna Bashqurtstan, Osetııa, Qarashaı-Sherkes Respýblıkasy, О́zbekstan, Polshadan lyp etpe shań tımes tulparlar qatyspaq. – Osy kúni at jarysynan basqa qandaı ulttyq sport oıyn túrleri kórsetiledi? – Jarys bir kúnniń ishinde ótip bitedi. Budan basqa, jamby atýdan, aýdaryspaqtan, teńge ilýden, qyz qýýdan, kókpardan, at ústindegi jititshilik óner túrlerinen kórsetilimder bolady. Sonymen qatar, jınalǵan jurtshylyq at nemese túıege minip serýendeı alady. – EKSPO kezinde ulttyq sport oıyndary osymen toqtap qalmaıtyn bolar? – Árıne, munymen toqtap qalmaımyz. EKSPO kórmesi kezinde ulttyq sport túrlerinen 3 aılyq sporttyq sharalar josparlanyp otyr. Atap aıtar bolsaq, kókpardan álem chempıonaty jáne aýdaryspaqtan álem kýbogy jolyndaǵy jarystar ótedi. Árbir oblys EKSPO-ǵa baılanysty ótkizetin mádenı-sporttyq sharalar aıasynda eki kún boıy osy atshabarda ulttyq sport túrlerinen oıyndar kórsetetin bolady.
Beken Qaıratuly, «Egemen Qazaqstan»