Dóńgelek ústel jumysyna belgili otandyq sarapshylar men saıasattanýshylar qatysty. Olardyń qatarynda: Aıdar Ámirebaev – Qoldanbaly saıasattaný jáne halyqaralyq zertteýler ortalyǵynyń jetekshisi; Aıdos Sarym − saıasattanýshy; Rústem Qadyrjanov – QR BǴM ǴK fılosofııa, saıasattaný jáne dintaný ınstıtýty saıasattaný bóliminiń etnosaıası zertteýler sektorynyń meńgerýshisi; Qanat Nurov − «Aspandaý» qorynyń prezıdenti; Bórihan Nurmuhamedov − saıasattanýshy; Dáýren Sákenuly − «Reıtıng.KZ» zertteý agenttiginiń dırektory boldy. Dóńgelek ústelge qatysýshylar Memleket basshysynyń «Rýhanı jańǵyrý: bolashaqqa baǵdar» baǵdarlamalyq maqalasy aıasynda Qazaqstandaǵy ulttyq biregeılikti qalyptastyrý men jandandyrý jáne júzege asyrý máselelerin, sonymen qatar, bul proseske áser etetin faktorlardyń aldyn alýdy talqylady. Sarapshylardyń aıtýynsha, ýrbanızasııa men mádenı jahandaný prosesterine baılanysty ózgerip otyratyn qoǵam men qoǵamdyq sananyń daǵdylanýy áleýmettik-ekonomıkalyq jetistiktiń mańyzdy kórsetkishi bolyp tabylady. Sondaı-aq, qatysýshylar ulttyq mádenı kod pen ulttyq biregeılikti saqtaý, ulttyq sananyń ártúrli polıýsterin kelistirý de óte mańyzdy shart ekenin atap ótti. Jalpy, pikirtalasqa qatysqan mamandar bizdiń qoǵamǵa qatysty jańǵyrtý jumystary qalaı júzege asatynyn áli de túbegeıli zertteý kerektigin aıtty. Olardyń sózinshe, ulttyq biregeılikke qatysty jańǵyrtý prosesi barysynda týyndaıtyn ishki jáne syrtqy syn-tegeýrinderge kóp kóńil bólý kerek. Atap óteıik, ÁESI pikirtalas alańy Elbasynyń strategııalyq ıdeıalaryn nasıhattaý men olardy júzege asyrýdaǵy tájirıbelerdi qalyptastyrý maqsatynda jumys istep keledi.
Talǵat SÚIINBAI, «Egemen Qazaqstan»
ALMATY