– Gamlet Tórehanuly, Elbasy buqaralyq sportty damytý kerektigin jıi aıtyp keledi. Bul maqsatta óńirde aıta qalarlyqtaı jetistikter bar ma? – Qazirgi tańda óńirde deneshynyqtyrý jáne sportpen júıeli túrde shuǵyldanýshylar qatary halyqtyń 26,9 paıyzyn qurap otyr. Jalpy, ótken jyly oblys sportshylary álem, Azııa chempıonattary men kýbok syndarynda 166 medalǵa, el chempıonattary men kýbok jarystarynda 714 júldege jáne halyqaralyq týrnırlerde 159 medalǵa qol jetkizdi. Salany damytýǵa bıyl barlyǵy 5,8 mıllıard teńge bólindi. Sońǵy eki jylda 5 sport kesheniniń paıdalanýǵa berilgeni de buqaralyq sporttyń damýyna jol ashyp otyr. Sondaı-aq, Taraz qalasy men aýdandarda 1600-den astam múmkindigi shekteýli azamattar sporttyń ár túrimen shuǵyldanady. Bir aıta keterligi, jyl saıyn jastar arasynda deneshynyqtyrý jáne sportpen shuǵyldanýshylar sany artyp keledi. Bul qýantarlyq jaıt. Máselen, búginde 131 myńnan astam jas sportpen aınalysady. Atalǵan kórsetkishterdiń bári de óńirde buqaralyq sporttyń damyǵanyn aıqyndaıdy. – Birqatar aýdandarda buqaralyq sportty qarjylandyrý kólemi oıdaǵydaı emes eken. Bul másele tóńireginde qandaı jumystar atqarylyp jatyr? – Árıne, oń ózgeristermen qatar, nazar aýdaratyn ózekti máseleler de bar. Máselen, ótken jyly buqaralyq sportty qarjylandyrý kólemi Merki aýdanynda 3,3 mln teńge jáne Moıynqum aýdanynda 5,0 mln teńge deńgeıinde bolsa, bıyl Moıynqum aýdany qarjyny tek 500 myń teńgege ǵana ósirgen. Sonymen qatar, Baızaq aýdanynda – 13, Moıynqum aýdanynda 11 jáne Merki aýdanynda 2 nusqaýshy ádisker birlikterin ashý qajet. Al Shý jáne Sarysý aýdandarynda nusqaýshy-ádisker birlikteri qysqarǵan. Aýyldyq okrýgterde sport boıynsha nusqaýshy-ádiskersiz buqaralyq sportty damytý qıynǵa túsedi. Oblys ákimi Kárim Kókirekbaev bul másele boıynsha aýdan basshylaryna tapsyrma da bergen bolatyn. – Siz birde óńirde aýa raıynyń jaǵdaıyna baılanysty qysqy sport túrlerin damytýǵa múmkindik bolmaı otyrǵanyn aıtyp edińiz. Sondaı-aq, Tarazdaǵy Baýyrjan Momyshuly atyndaǵy saıabaq ishinen jasandy muz aıdyny salynady degeli kóp boldy. Biraq nátıje áli joq. Nege? – Bir kásipker munda jasandy muz aıdynyn salmaqshy bolǵan. О́kinishke qaraı, halyq kóp kútken muz aıdynynyń qurylysy qazir toqtap qaldy. Degenmen, búginde Taraz qalasynan muz aıdynyn salý jumystary josparlanyp otyr. Eger atalǵan muz aıdyny salynsa, óńirde qysqy sport túrlerin damytýǵa mol múmkindik týady. – «Taraz Arena» ǵımaraty − Elbasynyń qatysýymen ashylǵan úlken keshen. Degenmen, sol sport nysany búginde qarjylyq jaǵynan ózin ózi aqtaı alyp otyr ma? – Bul sharýashylyq júrgizý quqyǵyndaǵy memlekettik kásiporyn. Endi qarjylyq jaǵyna kelsek, keshenge arǵy jyly 60 mıllıon teńge tabý mindettelgen bolatyn. Bul mejege jettik. Sondaı-aq, ótken jyly tıisti 100 mıllıon teńgeniń 90 paıyzy oryndaldy. Mundaǵy maqsat – jergilikti bıýdjetke salmaq túsirmeý bolyp otyr. Endi mekeme tóńireginde taldaý jasap, qarjylyq jaǵynan shynymen ózin ózi aqtaı ala ma, joq pa degen másele tóńireginde zertteý jumystaryn júrgizetin bolamyz. – «Taraz» fýtbol klýbynyń atyna jıi syn aıtylady. Ári qarjy shyǵyndap, syrttan maman ákelý jaıy taǵy bar. Biraq, sol mamandardyń da keıde kómegi tımeı jatady. Jalpy, Taraz fýtbolynyń taǵdyry týraly ne aıtasyz? – Búginde «Taraz» fýtbol klýbynda jattyqtyrýshy bolyp júrgen Vaıt Talgaev 1996 jyly sol «Tarazdy» chempıon qylǵan. Al endi syrttan maman ákelý jaıyna kelsek, búgingi fýtbol komandasynyń jetpis paıyzy jergilikti oıynshylar. Shyny kerek, «Taraz» fýtbol klýbynyń da jetistikterge jetsek degen maqsattary bar. – Olımpııa oıyndarynda top jarǵan jerlesterimiz barshylyq. Bolashaqta da óńirden shyǵatyn Olımpıada jeńimpazdaryn daıyndaýǵa múmkindik bar ma? – Jambyl óńirinen ár Olımpıada saıyn jeńimpazdar men júldegerler shyqqan. Sońǵy kezeńdegi Aqjúrek Tańatarov, Zúlfııa Gabıdýllına, Eldos Smetovti aıtsaq jetkilikti. Árıne, bolashaq jeńimpazdardy daıyndaýǵa múmkindik bar. Syrttan maman aldyrmaı-aq, bul máselege jergilikti bapkerlerdiń de múmkindigi tolyq jetedi.
Áńgimelesken Hamıt ESAMAN, «Egemen Qazaqstan»