О́zin sanaly túrde qurbandyqqa shalyp, birneshe adamnyń ómirin saqtap qalǵan polısııa qyzmetkerleriniń erligin qoǵamǵa úlgi etýdiń ózindik mańyzy bar. Sondyqtan da erligimen kórine bilgen osyndaı jandar týraly az-kem sóz qozǵaǵandy durys kórdik. Jol polısııasy basqarmasynyń aǵa ınspektory Tólegen Qusaıynov 2006 jyldyń 13 maýsymynda «Folksvagen» jeńil avtokóligimen Zerendi aýdanynyń tórt avtobýsqa bólinip mingen 120 balasyn Astana qalasyna saıahatqa aparýǵa shyqqan saparda jol apatyna tústi. Naqtyraq aıtsaq, Shortandy aýdanynda, Astana-Petropavl tas jolynyń on úshinshi shaqyrymynda qarsy jolaqqa shyǵyp ketken jolaýshy tasymaldaýshy «Gazel» mıkroavtobýsy balalardyń ómirine úlken qaýip tóndirgen edi. Sol kezde zymyrap kelip qalǵan mıkroavtobýstan jalt burylmaı, bar soqqyny ózine qabyldaǵan Tólegenniń jeńil avtokóligi saıǵa baryp tóńkerilip qaldy. Al jantaıyp baryp bir jaǵyna aýdarylǵan shaǵyn avtobýs joldy kóldeneń jaýyp tastady. Osylaısha jol polısııasy basqarmasynyń aǵa ınspektory Tólegen Qusaıynov pen onyń áriptesi aǵa ınspektor Qabıdolla Ápenov aýyr jaraqattanyp, óz erlikterimen jáne shıraq qımyldaý arqyly balalardyń ómirine tóngen qaýiptiń aldyn aldy. Olardyń bul erligi nazardan tys qalmady. Elbasynyń Jarlyǵymen ekeýine «Erligi úshin» medali tabystaldy. Taǵy bir mysal. Buzaqylar qaıda bolsa da bar. Sondaı keleńsiz jaǵdaılardyń biri Aqmola oblysy, Selınograd aýdany, Aqmol aýylynda boldy. Kosmonavtar kóshesi boıynda óz avtokóliginiń qasynda es-tússiz jatqan polısııa qyzmetkeri tabylǵandyǵy buǵan deıin habarlanǵan-dy. Jedel izdestirý sharalarynyń arqasynda bul oqıǵaǵa qatysty mán-jaılar anyqtaldy. Tarqatyp aıtqanda, Jeńis Kúptenov jumystan keıin úıine qaıtyp kele jatady. Sol mezet aıaldamada spırttik ishimdik iship otyrǵan bir top jastardy baıqaıdy. Daýryǵyp, aıaldamany bastaryna kóterip otyrǵan jastarǵa burylyp baryp, qoǵamdyq orynda bulaı isteý durys emestigin eskertken. Eskertpege álgiler shamdanyp, jabyla ketken. Aýyr soqqylardan keıin polısııa leıtenanty Jeńis Janǵabyluly esin jımastan sol jerde baqılyqqa attandy. Jary Nurgúl men qyzy Qaraqat sońynan jylap qala berdi. Oǵan «Erligi úshin» medali taǵaıyndalǵanymen, otbasyna eshkim jáne eshqashan qaıtara almaıdy ǵoı. Polısııa qyzmetkerleri qylmyspen kúresip, qoǵamdyq tártipti saqtap ǵana qoımaı, qajet deseńiz ot pen sýǵa da túsip jatady. Oǵan da naqty mysaldar jeterlik. Sondaı oqıǵanyń biri Aqmola oblysy, Zerendi aýdany, Qarabulaq aýylynda oryn alǵan-dy. 2015 jyldyń 10 qyrkúıeginde 23 jastaǵy kishi serjant Danııar Amanjol jeke turǵyn úıdiń órtke oranǵanyn kóredi. Sol mezet jedel áreketke kóship, álgi janyp jatqan úıdiń terezesin shaǵyp, ishinen tirideı órtenip ketýine shaq qalǵan tórt balany jáne olardyń analaryn aman alyp shyǵady. Mundaı jany jaısań azamattarǵa qandaı qurmet kórsetseń de laıyq. Tórt bala men olardyń anasyn ólim aranynan arashalap qalǵan Aqmola oblysy IID jol-patrýldik polısııasynyń qyzmetkeri Danııarǵa Táýelsizdik merekesi kúni saltanatty jaǵdaıda IID bastyǵy Jaılaýbek Halyquly Prezıdent atynan «Erligi úshin» medalin tabystady. «Azamattardyń konstıtýsııalyq quqyǵyn qorǵaý, sondaı-aq, qylmyspen kúresý maǵan ant arqyly senip tapsyrylǵan. Sondyqtan da men óz qyzmettik boryshymdy adal atqardym dep nyq senimmen aıta alamyn. Eń bastysy – áıel men onyń balalary zardap shekken joq. Sondyqtan da men úshin osyndaı nagradany alý úlken mártebe. Bul birinshiden, Aqmola oblysynyń barlyq polıseıleriniń jáne meniń áke-sheshemniń úlesi. Qazaqstan Respýblıkasyna qyzmet etemin!», deıdi Danııar aǵynan jarylyp. Mine, osyndaı azamattardyń erlikteri arqyly búkil oblystyń jumysyna baǵa berýge de bolady. Maqalany jazýdaǵy basty maqsatymyz – polısııa qyzmetkerleriniń erlik isterin pash ete otyryp, olardyń qoǵamdaǵy bedelin kóterý. Qoryta aıtqanda, Qazaqstanda sońǵy 23 jylda 2 myńnan astam polısııa qyzmetkeri zardap shekkeni belgili bolyp otyr. 1993 jyldan beri 764 polıseı óz qyzmetterin atqarý barysynda qaza tapqan. Osy kórsetkishter arqyly-aq biz polısııa qyzmetiniń aýyr ekendigin jáne óz ómirlerin táýekelge baılaıtyndyǵyn kóremiz. Olardyń erlik isteri óskeleń urpaqqa úlgi.
Asqar TURAPBAIULY, «Egemen Qazaqstan»
Aqmola oblysy