Jıynda Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynda qamtylǵan «Qazaqstannyń 100 jańa tulǵasy» jobasy jan-jaqty talqylandy. Sarapshy mamandar «Bizdiń zamandasymyzdyń áleýmettik beınesi qandaı? «Qazaqstannyń 100 jańa tulǵasy» quramyna kim úmitker bola alady? Úmitkerlerdi tańdaý úshin qandaı krıterıler men baǵdarlardy jasaý qajet? Jobany iske asyrý úshin qandaı quraldar tıimdi bolýy múmkin? Qazaqstanda iske asqan qandaı jobalar qoıylǵan tapsyrmalardy iske asyrý úshin bastama bola alady? Bul jobanyń aqparattyq súıemeldeýi qandaı bolýy qajet?» degen negizgi saýaldarǵa jaýap izdedi.
– Prezıdentimiz óziniń «Bolashaqqa baǵdar: rýhanı jańǵyrý maqalasynda «Qazaqstannyń 100 jańa tulǵasy» jobasynyń bastaýyn belgilep berdi. Joba naqty máselelerdi sheshýge baǵdarlanǵan: «qoǵamǵa óz aqylymen, qoldarymen jáne talantymen zamanaýı Qazaqstandy jasaýǵa at salysqan adamdardyń shyn kelbetin kórsetý, aqparattyq qoldaý kórsetýdiń jańa mýltımedııalyq alańyn qurý jáne bizdiń ataqty zamandastarymyzdy áıgilendirý, «100 jańa tulǵalar» jobalarynyń tek jalpyulttyq qana emes, sonymen qatar, aımaqtyq jobalaryn qurý. Qazaqstan jetistiginiń tarıhy – bul onyń ónegeli azamattarynyń is-áreketteriniń nátıjesi. Ár jeńistiń artynda, eldiń ár jetistikteriniń artynda bizdiń zamandastarymyzdyń jeke jetistikteri tur. Olardyń eńbekteriniń sınergııalyq serpilisi, Táýelsizdik jyldary ishinde Qazaqstanǵa adamı damýdyń joǵary áleýeti bar elderdiń sanyna kirýdi ǵana emes, sonymen qatar, odan ári qarqyndy damý úshin jaǵdaı jasaıdy» dep Elbasymyz óz maqalasynda bul jobanyń mańyzdylyǵyna keń mazmunda toqtalǵan bolatyn. Shyn máninde, bul memlekettiń bolashaǵy úshin aýadaı qajet ıgi bastama. Dana halqymyz «Erim deıtin el bolmasa, elim deıtin er qaıdan bolsyn» dep tegin aıtpasa kerek. Azamattardyń el ıgiligi jolynda atqarǵan tabandy eńbegi men tarıhı erlikteri jyldar paraǵynda qattalyp, keler urpaq úshin saqtalý kerek. Tek osyny júıeli túrde iske asyrý úshin, ádiletti, durys tańdaý jasalýy qajet – deıdi QSZI áleýmettik-ekonomıkalyq zertteýler bóliminiń basshysy, áleýmettaný ǵylymdarynyń doktory Lázzat Nurqatova.
«Úmitkerlerdi irikteý elimizdiń barlyq óńirleri boıynsha júrgiziledi. Bul azamattar quramynan tek tanymal tulǵalardy ǵana emes, ómir joly úlgi tutýǵa laıyq, qarapaıym azamattardy da kórýimiz kerek. Bul eshqandaı da báıge emes, elimizdiń kórkeıýine zor úles qosqan naǵyz azamattardyń shynaıy bolmysyn jalpaq jurtqa úlgi etip kórsetý», deıdi mamandar.
Talqylaýǵa qatysqan ǵylymı-zertteý ınstıtýttarynyń jetekshi sarapshylary, tarıhshylar, qoǵam qaıratkerleri men ár salanyń kóshbasshylary atalmysh jobanyń el ómirindegi mańyzdylyǵyna toqtalyp, óz oı-pikirlerin ortaǵa saldy. Olardyń oıynsha «Bul esimge laıyq azamattar sapynda, Táýelsizdiktiń qadirin biletin, halyqtyń tanym-tarıhymen tereń tamyrlanǵan tulǵalar bolýy tıis».
Arman OKTIаBR,
«Egemen Qazaqstan»
ALMATY