Konsertke Qazaqstannyń eńbek sińirgen qaıratkeri Baǵdat Ábilhanov (skrıpka), Aısulý Báıkenova (skrıpka), Ermek Qurmanaev (vıolonchel), Ekaterına Lapýhına (fortepıano) jáne Qazaqstannyń eńbek sińirgen qaıratkeri, maestro Abzal Muhıtdınovtyń jetekshiligimen Kameralyq orkestr qatysady.
- Orkestrant-solıst retinde shetelde jumys isteıtin mýzykant dostarymyz óte kóp, olar túrli shyǵarmalarmen konsertterde óner kórsete alady. Osy joly biz álemge áıgili altıst Denıs Krasnokýtskııdi shaqyrdyq. Bolashaqta biz Kameralyq zaldyń sahnasyna London fılarmonııa orkestriniń solısteri jáne basqa da tanymal mýzykanttarmen birge shyǵýdy josparlap otyrmyz. Bizdiń maqsatymyz – «Astana Opera» teatrynda oryndaýshylyq deńgeıi joǵary solısterdiń basyn qosyp, kórermenderimizge rýhanı kesh syılaý. Amerıkalyq kompozıtor Maýrısıo Bınen osy jobaǵa arnaıy skrıpka, alt pen orkestr oryndaıtyn «Ikebana» dep atalatyn týyndysyn ákeldi. Amerıkalyq yrǵaqta jazylǵan bul shyǵarma bizdiń tyńdarmandardy beı-jaı qaldyrmaıtyny anyq. «Mýzykalyq qıylys» konsertterindemýzykanttar mindetti túrde qazaq kompozıtorlarynyń da shyǵarmalaryn oryndaıdy. Bul joly biz kórermen nazaryna Ǵ.Jubanovanyń №1 Kvartetitin usynamyz - dep habarlady jobanyń birlesken avtory Aısulý Báıkenova (skrıpka).
Konsertte sheteldik klassık-kompozıtorlar – Anrı Vetan, Astor Pıassolla jáne taǵy basqa avtorlardyń týyndylary, sondaı-aq, ulttyq mýzyka shyǵarmalary da oryndalady.
Jeltoqsan aıynda joba avtorlary Baǵdat Ábilhanov pen Aısulý Báıkenova Serbııa astanasy Belgradta jeke konsert beredi.