Sharany «Qazaqfılm» AQ, QHR Shynjań Tıan-Shan kınostýdııasy jáne QHR Shynjań fılm taratý jáne kórsetý kompanııasy birlesip atqarmaq.
«Shynjań kıno aptalyǵy «2017 Qazaqstandaǵy qytaı kıno festıvali» aıasynda ótetin mádenı sharalarynyń biri retinde Qytaı jáne Qazaqstan tarapynan jan-jaqty qoldaý taýyp, Qazaqstan men QHR Shynjań kıno salasyndaǵy tájirıbe almasý men mádenı yntymaqtastyǵynyń alańyna aınaldy. Sonymen qatar, munyń Qazaqstan kórermenderiniń Qytaıdy, tipti Shynjań kıno ónerin jaqynyraq tanýyna aıtarlyqtaı járdemi bolmaq. Eki aptaǵa jalǵasatyn «Shynjań kıno aptalyǵy» sheńberinde Almaty qalasynyń «Kınopark», «Arman» tárizdi 5 kınoteatrynda ár alýan taqyryptaǵy jáne qoıý ulttyq erekshelikke ıe kıno týyndylar kórsetiledi», deıdi «Murat joly» Mádenıet qoǵamdyq birlestiginiń tóraǵasy Dýman Amanuly.
Onyń aıtýynsha, «Shynjań kıno aptalyǵy» aıasynda oqıǵalary shynaıy ómirden alynyp, sheksiz mahabbatty jyrlaıtyn «Shynaıy mahabbat» fılmi, aqyndyqty asqaq murat tutqan qazaq qyzynyń aıtys ónerin órge súırer sulý jan-dúnıesi sýrettelgen «Gúlbıke» fılmi, Shynjań jasóspirimderiniń jastyq rýhyn jigerlendirýge baǵyttalǵan «Arman asýy» fılmi, jáne aqsha, adamı qasıet, otbasy, mahabbat jáne dostyq taqyrybyndaǵy «Aqshanyń álegi» atty komedııalyq fılm sekildi tyń týyndylar kórermender nazaryna usynylmaq.