Memlekettik hatshy bıyl eki el arasyndaǵy dıplomatııalyq qarym-qatynastardyń ornaǵanyna 25 jyl tolǵanyn, Elbasy Nursultan Nazarbaev pen Qytaı Halyq Respýblıkasynyń Tóraǵasy Sı Szınpın arasynda jyly ári dostyq qarym-qatynas ornaǵanyn aıryqsha atap ótti. Ekijaqty yntymaqtastyqtyń joǵary deńgeıi, senimdi dıalog, áriptestikti nyǵaıtýǵa degen ózara múddelilik sonyń nátıjesi bolyp sanalady. Sondaı-aq, Memlekettik hatshy qytaı medısınasynyń tamyryn tereńnen alatynyn, dárigerlerdiń myńdaǵan jyldar boıy jınaqtaǵan tájirıbesine negizdelgenin aıtty. – Bizdiń azamattar em alýdyń balamaly ádisterine jıi júginetin boldy. EKSPO-2017 halyqaralyq kórmesi qarsańynda ashylyp otyrǵan Qytaıdyń dástúrli medısınalyq ortalyǵy qazaqstandyqtardyń emdelý múmkindikterin arttyrýǵa septigin tıgizedi. Bul ortalyq halyq densaýlyǵyn saqtaýdyń úzdik resýrstarynyń biri bolatynyna senimim mol, dedi Gúlshara Ábdiqalyqova. О́z kezeginde Qytaı Halyq Respýblıkasynyń Qazaqstandaǵy elshisi Le Iýıchen Qytaı eli úshin Qazaqstan Ortalyq Azııadaǵy eń senimdi áriptes bolyp otyrǵanyn, búginde álemniń kóptegen elderi dástúrli qytaı medısınasyn tanı bastaǵanyn jetkizdi. Al elimizdiń Densaýlyq saqtaý mınıstri Eljan Birtanov Memleket basshysynyń medısına salasynyń eksporttyq áleýetin damytýǵa tapsyrma júktegenin, osy oraıda qazaqstandyqtar men sheteldikterdiń Qazaqstanda em alýyna jan-jaqty jaǵdaı jasaý baǵytynda jumys júrgizilip jatqanyna toqtaldy. Prezıdenttiń Is basqarmasy medısınalyq ortalyǵynyń jetekshisi Valerıı Benberınniń aıtýynsha, bul ortalyqta Qytaıda jasalǵan túrli tunbalar men qaınatylatyn dáriler satatyn dárihana bolmaq. Elimizdiń kez kelgen azamatyn qýana qarsy alatyn bul ortalyq kelýshilerdi dárilik shópter men massaj, ıne, súlik salý jáne túrli gımnastıkalardyń kómegimen emdeıdi. Iаǵnı, manýaldy terapııa, refleksti terapııa, fıtoterapııa syndy Shyǵys medısınasy keńinen qoldanylady. Aqyly túrde qyzmet kórsetetin ortalyqta Qytaıdan kelgen bilikti mamandar eńbek etedi. Sonymen birge, otandyq mamandar da qytaılyq dárigerlermen ózara tájirıbe almasyp, pasıentterdi Shyǵys medısınasymen emdeýdi úırenbek. Iаǵnı, atalǵan ortalyqta Qytaıdyń dıplomdy, óz elderinde bedeli, úlken tájirıbesi bar mamandary jumys isteıdi, dedi ol. Sharaǵa qatysqan Beijing Tong Ren Tang International Information Technology Co., Ltd. kásipornynyń basqarma tóraǵasy Djı Gýanfeıdiń aıtýynsha, atalǵan kásiporyn álemniń 26 memleketinde ózderiniń 150-den astam dárihanasyn ashqan, dárilik shóppen emdeý arqyly dańqy shyqqan kásiporyn sanalady. Al CITIC GROUP kompanııasynyń dırektorlar keńesiniń tóraǵasy Chang Jenmıng qytaıdyń dástúrli medısınasynyń negizgi erekshelikteri týraly áńgimelep, ertedegi Sın ımperııasynyń 8 bıleýshisi atalǵan dástúrli medısınany tutynǵanyn jetkizdi. Sondaı-aq, qytaı mamandary óz kompanııalarynyń tarıhymen, jumys júıesimen jáne iskerlik áriptesterimen tanystyryp, sapaly ári nátıjeli em kórsetetinderine sendirdi.
Dýman Anash, «Egemen Qazaqstan»
Sýretti túsirgen Erlan Omarov, «Egemen Qazaqstan»