Ulttyq Banktiń Ortalyq fılıalynda (Astana qalasy) Halyqqa arnalǵan tazartylǵan altyn quımalardy satý men satyp alý baǵdarlamasy týraly buqaralyq aqparat quraldarynyń ókilderine baıandaldy. Osy jóninde áńgime qozǵaǵan fılıal dırektory Ámirbek Sankýbaev osydan bir apta buryn atalǵan baǵdarlamanyń iske qosylǵandyǵyn Ulttyq bank basshysy Danııar Aqyshevtiń Almatyda jýrnalıster aldynda málimdegendigin eske salyp ótti. Osy jerde jýrnalısterge baǵdarlama týraly beınerolık pen taza altyn quımalardyń satýǵa shyǵarylǵan úlgileri kórsetildi.
«Baǵdarlamanyń iske qosylýy halyq úshin qanshalyqty qyzyqty jáne bul istiń qandaı táýekelderi bar degen máseleler tóńireginde suraqtar týyndaýda. Osyǵan baılanysty aıtarym, buryn bizdiń elimizdiń adamdary óz qarajattaryn teńge jáne sheteldik valıýtalar túrinde jınaqtap, saqtap kelgen bolatyn. Endi mine, qarajatty jınaqtap saqtaýdyń úshinshi túri retinde Halyqqa arnalǵan tazartylǵan altyn quımalaryn satý men satyp alý baǵdarlamasy iske qosylyp otyr. Baǵdarlamaǵa qatysatyn altyn quımalardy Qazaqstan teńge saraıy daıyndady. Olar halyqqa 10, 20, 50 jáne 100 gramm bolyp tórt túrde usynylýda. Máselen, 10 gramdyq quımalar kúreń qyzyl, 20 gramdyq – jasyl, 50 gramdyq – kógildir tústi arnaıy oraýmen jáne 100 gramdyq quımalar – altyn tústes oraýmen usynyldy. Árbir quıma qorǵanysh elementterimen (quımalardyń tegis beti, mıkromátin jáne bederli qyr) jáne quımalardy mehanıkalyq búlinýden qorǵaıtyn jáne oraýdyń ashylǵan-ashylmaǵanyn ońaı tekserýge múmkindik beretin arnaıy oraýmen shyǵarylady. Qorǵanysh oraý da quımanyń sapa sertıfıkaty bolyp tabylady. Sondyqtan, quımany uqyptap saqtaý jáne oraýyn ashpaý usynylady. Altyn quımalar ekinshi deńgeıdegi bankter arqyly satylatyn bolady. Altyn quımalardy ekinshi deńgeıdegi bankterdiń klıentke «kúnbe kún» aqsha tóleý arqyly keri satyp alý múmkindigi olardyń ótimdiligin qamtamasyz etýdiń negizgi faktory bolady», dedi Á. Sankýbaev. Sondaı-aq, ol bul altyn quımalar shıkizattan bastap tolyq túrde Qazaqstanda jasalynǵanyn, onyń betinde tórt 9 sıfry quımalar sapasynyń óte joǵary ekendigin bildiretindigin atap ótti jáne alǵashqy altyn quımalardy Elbasynyń satyp alǵandyǵyn eske saldy. «Qazirgi kúni altyn quımalar Halyq banki men Eýrazııalyq bank arqyly saýdalanýda. Sonymen qatar, ekinshi deńgeıdegi basqa da banktermen altyn quımalaryn saýdaǵa shyǵarý jóninde kelissózder júrgizilýde. Demek, altyn quımalardyń saýda-sattyq aıasy aldaǵy ýaqytta keńeıe túsedi degen úmittemiz. Saýdalaý isi qazirgi kúni Astana, Almaty, О́skemen, Atyraý qalalarynda júrgizilýde. Degenmen, osy qalalardan basqa óńir turǵyndarynyń satyp alyp jatqandyǵynan habardar bolyp otyrmyz. Iаǵnı, altyn quımalarǵa suranys bar ekendigi baıqalady. Kóp keshikpeı bul iske basqa qalalar da qosylatyn bolar», dedi Ámirbek Býrıuly. Sondaı-aq, ol bul altyn quımalardy satyp alǵan adam ony qarajat jınaǵy retinde, keleshek úshin rezerv retinde jáne ekinshi bir adamǵa usynýǵa bolatyn baǵaly syılyq retinde qarastyrýyna bolatyndyǵyn aıtyp ótti. «Altyn quımalardy satyp alýdaǵy táýekel máselesine kelsek, altynnyń aty altyn. Ol osy ýaqytqa deıin óz baǵasyn joıǵan emes. Degenmen, altynnyń baǵasy túrli faktorlardyń áserimen álemdik bırjalarda ózgerip turatyndyǵyn da eske salamyz. Máselen, halyqaralyq bırjada altynnyń 10 gramynyń baǵasy ústimizdegi jyldyń 31 mamyrynda 126159 teńgeni qurasa, dál búgingi, ıaǵnı 7 maýsym kúni 129390 teńgege kóterilipti», dep altynnyń álemdik baǵasy jónindegi sońǵy jańalyqpen jýrnalısterdi habardar etti. Munan keıin jýrnalısterge Ulttyq banktiń Ortalyq fılıalynyń shaǵyn murajaıyn aralap kórýge usynys jasaldy. Murajaıda kezindegi patshalyq Reseıdiń aqsha banknottarynan bastap, keńestik aqshalar jáne ulttyq valıýtamyz – teńge banknottary, ınvestısııalyq, kolleksııalyq teńge monetalary qoıylǵan eken. Munda bank qyzmetkerleri jýrnalısterge olardyń tarıhy men shyǵarylý jaǵdaıy jáne ózindik erekshelikteri týraly túsiniktemeler berdi.
Suńǵat Álipbaı, «Egemen Qazaqstan»