Sonymen, ulttyq baıqaýdyń aımaqtyq synynda Shıeli aýdanynyń turǵyndary − Islamhanovtar áýleti jeńimpaz atandy. Otaǵasy Áribjan Islamhanov tyl ardageri jáne eńbek eri, jary – Nazym Qalmenova «Batyr ana», «Altyn alqa» ıegeri. Shańyraq qurǵandaryna 59 jyl bolǵan otbasy búginde 10 baladan 40 nemere, 16 shóbere súıip otyr. Al birinshi oryndy Jalaǵash aýdanynan Ǵanıevter otbasy ıelense, ekinshi oryn araldyq Aımyrzaevtar otbasyna buıyrdy. Júldeli úshinshi oryndy syrdarııalyq Sultanovtar men jalaǵashtyq Nurmaǵanbetovter áýleti qanjyǵalaryna baılady. Sonymen qatar, Jańaqorǵan aýdanynan Arynovtar otbasy «Ulaǵatty otbasy» nomınasııasymen, qarmaqshylyq Shymbaevtar otbasy «О́nerli otbasy» nomınasııasymen, Qyzylorda qalasynan Balmahanovtar otbasy «Qamqorlyq» nomınasııasymen, syrdarııalyq Mıassovtar áýleti «Otbasylyq úılesim» nomınasııasymen marapattaldy. Oblys ákimi Qyrymbek Kósherbaev baıqaýǵa barlyq qatysýshylardy osyndaı úlken jetistikterimen quttyqtady. – Elbasy Nursultan Nazarbaevtyń bastamasymen qolǵa alynyp, búginde ulttyq mártebege ıe bolǵan «Mereıli otbasy» baıqaýy otbasy qundylyqtary men qazaq úshin qashanda kıeli sanalatyn bir shańyraq astynda berekeli ómir súrýdiń mańyzdylyǵyn nasıhattaýda orny erekshe, taǵylymdy sharanyń birine aınalyp otyr. Aımaǵymyzda tórtinshi ret ótkizilip otyrǵan bul mereıli sharaǵa qatysýǵa nıet bildirýshiler jyldan-jylǵa artyp kele jatqany qýantady. Bıyl baıqaýǵa oblysymyzdyń barlyq óńirinen 337 otbasy qatysty. Bul otbasylardyń barlyǵy da keremet, naǵyz jeńimpaz otbasylar, – dedi aımaq basshysy. Baıqaý jeńimpazdary dıplomdarmen jáne baǵaly syılyqtarmen marapattaldy.
Erjan Baıtiles, «Egemen Qazaqstan»
QYZYLORDA