Bul – on saýsaǵynan óner tamǵan jigittiń jasap shyǵarǵan alǵashqy dúnıesi emes. Qolynan kelmeıtini joq Murat buǵan deıin qosalqy bólshekterden maı shaıqaıtyn, qymyz pisetin qural-jabdyqtar jasap, aýyldastarynyń tańdaıyn qaqtyrypty. Bul kisiniń ázirlegen qurylǵysymen qymyzdy toq arqyly pisýge bolady. Qazir sheberdiń qolynan shyqqan qurylǵyny Katonqaraǵaı aýdanynan bólek oblystyń ózge aımaqtarynan kelip, satyp alatyndardyń qatary kóp eken. Baǵasy da qoljetimdi. 20-25 myń shamasynda. Al áleýmettik jelini shýlatqan «Aýdı-arbany» byltyr kúzde jasaǵan eken. Alpys eki jastaǵy Úlken Naryn aýylynyń turǵyny arbaǵa 4 adamnyń erkin sııatynyn aıtady. «Bul kólik ózimdiki edi. Jol apatyna túsip, jaramsyz bolyp qalǵannan keıin aldyńǵy bóligin túgel alyp tastap, artqy bóliginen arba jasap shyǵardym. Qıraǵan kóliktiń artqy bóligine jalǵastyryp dárte saldym, osylaısha kólik arbaǵa aınalyp shyǵa keldi. Júrgenge óte qolaıly. Jep-jeńil, qolmen-aq ıterip júrgizýge bolady», deıdi Murat Shataev. Búginde sheberdiń aýylda ózi ashqan kólik jóndeý ortalyǵy bar. Máshıneniń qulaǵynda oınaıtyn Murat Shataev jol apatyna túsip, byt-shyty shyqqan kólikterdi de qalpyna keltire alatyn kórinedi.
Azamat Qasym, «Egemen Qazaqstan»
Shyǵys Qazaqstan oblysy