Keshe Memleket basshysy Qaraǵandy oblysynyń ákimi Serik Ahmetovti qabyldady, dep habarlady Qazaqstan Respýblıkasy Prezıdentiniń baspasóz qyzmeti.
S.Ahmetov Memleket basshysyn oblystyń áleýmettik-ekonomıkalyq damýy jóninde aǵymdaǵy jyly atqarylǵan jumysy týraly habardar etti. 8 aıdyń qorytyndysy boıynsha ónerkásip ónimi óndirisiniń kólemi 870 mlrd. teńgeden asty. Bul rette 2011 jyldyń sońynda aıǵaqty kólem ındeksi 105 paıyz bolady dep kútilýde. Qaraǵandy oblysy údemeli ındýstrııalyq-ınnovasııalyq damý baǵdarlamasy aıasyndaǵy jobalardy iske asyrý boıynsha elimizdiń ózge óńirleri arasynda kósh bastap keledi. Indýstrııalandyrý kartasyna óńirden jalpy somasy 282,2 mlrd. teńge 45 joba engizildi, 5 myńnan asa jumys orny qurylatyn bolady. Jyl basynan beri jalpy somasy 4 mlrd. teńgeni quraıtyn 9 joba iske qosyldy, 507 jumys orny quryldy. Bıylǵy jyldyń sońyna deıin 42 mlrd. teńgeden astam somaǵa 15 ınvestısııalyq joba júzege asyrylyp, 1350 jumys orny ashylatyn bolady. Olardyń arasynda «Sary Qazyna» JShS katodty mys óndiretin zaýyt qurylysy, «Hrom-T» JShS ferroquıma óndirisi kesheni, №2 domna peshi men «Arselor Mıttal Temirtaý» AQ ázirlemelerdi úzdiksiz quıý mashınasy, «QazAvıaSpektr» JShS aýyl sharýashylyǵy ushaqtarynyń óndirisi, Qaraǵandy JEO-3 jańǵyrtý jáne qýattylyǵyn arttyrý jónindegi máni zor jobalar bar.
Sonymen qatar, oblys «Bıznestiń jol kartasy-2020» memlekettik baǵdarlamasyn iske asyrý boıynsha da birinshi orynda keledi. Bul jumysta óńirde ázirlengen bazalyq salalardy damytý tujyrymdamasy negizgi qural bolyp tabylady. Búgingi kúnge deıin baǵdarlama aıasynda nesıelerdi sýbsıdııalaý men kepildendirý boıynsha 14 mlrd. teńgeden asa somaǵa 87 joba maquldandy. Osynyń arqasynda 10 myńǵa jýyq jumys orny saqtalyp, 2 myńnan astam jumys orny jańadan ashyldy. Qaraǵandy oblysynyń 2010-2015 jyldarǵa arnalǵan energııa únemdeý boıynsha keshendi jospary qabyldandy. Atalǵan qujat kommýnaldyq júıelerdi únemdi paıdalanýǵa baılanysty otandyq ázirlemelerge negizdelgen. Kútiletin derekter boıynsha aǵymdaǵy jyldyń 9 aıynda aýyl sharýashylyǵy ónimderiniń jalpy kólemi 69,7 mlrd. teńgeni quraıtyn bolady. Bul – 2010 jyldyń sáıkes kezeńimen salystyrǵanda 18,7 paıyz artyq.
El Táýelsizdiginiń 20 jyldyǵyn atap ótýge baılanysty sharalar sheńberinde oblysta eldi mekenderdiń ınfraqurylymyn daıyndaý, abattandyrý, kógaldandyrý boıynsha aýqymdy jumystar atqarylýda. Búginge deıin myna nysandar, atap aıtqanda, oblystyq qan ortalyǵy, Qaraǵandy qalasyndaǵy náreste ortalyǵy, Shahtınsk qalasyndaǵy saıası qýǵyn-súrgin qurbandaryn este saqtaý murajaıy, balabaqshalar, turǵyn úıler, saıabaqtar, sport alańdary, mádenıet qaıratkerleriniń eskertkishteri paıdalanýǵa berildi. Táýelsizdik mereıtoıy qarsańynda tennıs ortalyǵy, muz aıdyny, boks ortalyǵy, 4 myń oryndyq meshit, kardıohırýrgııalyq ortalyqtyń jańa blogy, emhana, Temirtaý qalasyndaǵy tarıhı-mádenı ortalyq, Qaraǵandy qalasynda Qazybek bıdiń, Qanysh Sátbaevtyń eskertkishteri jáne basqa da nysandar ashylatyn bolady. Tek sońǵy 10 jyldyń ishinde Qaraǵandy oblysynda turǵyndardyń ortasha aılyq aqshalaı kiristeri 6 esege artty, al kiris mólsheri kúnkóris sheginen tómen turǵyndar úlesi 39 paıyzdan 3 paıyzǵa tómendedi. Esep qorytyndysy boıynsha Memleket basshysy Qaraǵandy oblysynyń ákimine óńirdi áleýmettik-ekonomıkalyq jaǵynan odan ári damytýǵa qatysty naqty tapsyrmalar berdi.