– Bıyl biz elderimiz arasyndaǵy dıplomatııalyq qatynastardyń 25 jyldyǵyn atap ótýdemiz. Osy kezeńde yntymaqtastyǵymyzdyń aralyq qorytyndylaryn jasap, birge atqarǵan jumysty saralap, bolashaqtaǵy damýdyń joldaryn aıqyndaýǵa bolady, – dedi Qazaqstan Prezıdenti.
Nursultan Nazarbaev Qazaqstan men Qytaıdyń halyqaralyq jáne óńirlik basqosýlar aıasyndaǵy ózara is-qımyly joǵary deńgeıde ekenine nazar aýdardy.
– Osyndaı úılesimdi jumystyń jarqyn mysaly – Shanhaı yntymaqtastyq uıymy aıasyndaǵy birlesken is-qımylymyz. Erteń biz uıymnyń tarıhı otyrysyna qatysamyz. Ol Úndistan men Pákistannyń qosylýy arqyly keńeıedi. Osy otyrystan keıin ShYU-daǵy tóraǵalyq Qytaıǵa ótedi. Sizderge sáttilik tileımiz, – dedi Memleket basshysy.
Elbasy, sondaı-aq, Qazaqstan men Qytaı arasyndaǵy saýda aınalymynyń kólemi artqanyn atap ótti.
Sonymen qatar, Nursultan Nazarbaev «Nurly jol» baǵdarlamasy men «Bir beldeý, bir jol» bastamasynyń ushtasý nátıjelerine toqtaldy.
– Jalpy, bizdiń jan-jaqty ári qarqyndy ózara is-qımylymyzdy úlgi tutarlyq yntymaqtastyq dep nyq senimmen ataýǵa bolady. Onyń oń qarqynyna qaramastan, buǵan qanaǵat etýge bolmaıdy. Alǵa ilgerileı berýimiz kerek. Bizdiń ekijaqty qatynastarymyzdyń basym baǵyttary boıynsha da tıisti áleýet bar. Eń bastysy – Qazaqstan aýmaǵynda úılesimdi jalǵasyn taba bilgen Jibek joly ıdeıasyn júzege asyrý. Osy tórt jyl ishinde biz 1500 shaqyrym temirjol jáne 3000 shaqyrym avtokólik joldaryn saldyq. Bizde 2 temirjol jáne 6 avtokólik ótkeli bar. Osylaısha, QHR-men saýdany damytýdyń arqasynda Qazaqstan tranzıttik memleketke aınalyp otyr, – dedi Memleket basshysy.
Qazaqstan Prezıdenti Qazaqstan-Qytaı qatynastaryn damytý máselelerine erekshe nazar aýdaryp otyrǵany úshin QHR Tóraǵasyna alǵys aıtyp, elderimizdiń órkendeýine arnalǵan jobalardy júzege asyrý jolynda tabys tiledi.
Sı Szınpın Nursultan Nazarbaevqa qonaqjaılyq kórsetkeni úshin rızashylyq bildirip, Qazaqstan astanasynyń joǵary qarqynmen damyp kele jatqanyn atap ótti.
– 20 jyl ishinde Astanada Qazaqstandy jarqyn bolashaqqa bastaıtyn asa aýqymdy ózgerister boldy. Nursultan Nazarbaevtyń basshylyǵymen Qazaqstan ulttyq jańǵyrý men memleket qurylysy isinde jańa tabystarǵa qol jetkizetinine senimdimin. 25 jyldaǵy yntymaqtastyq barysynda barlyq baǵyttar boıynsha kóptegen nátıjege qol jetkizdik. Bizdiń saıası qarym-qatynasymyz senimge negizdelip damýda, – dedi QHR Tóraǵasy.
***
Qytaı Halyq Respýblıkasynyń Tóraǵasy Sı Szınpınniń Qazaqstan Respýblıkasyna resmı saparynyń qorytyndysy boıynsha mynadaı qujattar qabyldandy:
– Qazaqstan Respýblıkasynyń Prezıdenti men Qytaı Halyq Respýblıkasy Tóraǵasynyń birlesken málimdemesi;
– «Jibek Joly» qorynyń jekelegen kiris túrlerin salyq salýdan bosatý týraly kelisim;
– Kıno óndirisi salasyndaǵy yntymaqtastyq týraly kelisim;
– Qorǵas ózeninde selden qorǵaıtyn «Shúkirbulaq» birlesken bógetin salýdaǵy yntymaqtastyq týraly kelisim;
– Qazaqstan Respýblıkasy Qarjy mınıstrligi men Qytaı Halyq Respýblıkasynyń Memlekettik salyq ákimshiligi arasyndaǵy salyq máseleleri jónindegi memorandým;
– Kólik ınfraqurylymy salasyndaǵy yntymaqtastyqty nyǵaıtý týraly memorandým;
– Qazaqstan Respýblıkasynan Qytaı Halyq Respýblıkasyna eksporttalatyn muzdatylǵan usaq mal etine qatysty ınspeksııa, karantın talaptary jáne veterınarlyq-sanıtarlyq talaptar jónindegi hattama;
– «Qazaqstan» RTRK» AQ jáne Qytaı Halyq Respýblıkasynyń ortalyq televıdenıesi arasyndaǵy memorandým;
– Qazaqstan Respýblıkasy men Qytaı Halyq Respýblıkasy Úkimetteri arasyndaǵy sýperkompıýter usyný jobasy jónindegi yntymaqtastyq týraly memorandým;
– Zerthanalyq jabdyqtardy usyný týraly kelisim;
– «Samuryq-Qazyna» ulttyq ál-aýqat» qory men Qytaıdyń Halyqaralyq saýdaǵa qolǵabys kórsetý komıteti arasyndaǵy yntymaqtastyq týraly kelisim;
– Qazaqstan Respýblıkasynyń Tuńǵysh Prezıdenti – Elbasy kitaphanasy men Qytaıdyń qoǵamdyq akademııasy arasyndaǵy ǵylymı-mádenı yntymaqtastyq týraly kelisim.