Damır Kárimov óziniń qoǵamdyq jumystarymen belgili azamat. Ol qorshaǵan ortany qorǵaýdy qoldaıtyn túrli aksııalarǵa belsene qatysyp, Qaraǵandydaǵy «PosadiDerevo.kz» qoǵamdyq qozǵalysyna jetekshilik etedi. Sonymen qatar, ol velosıpedpen qysy-jazy júretin oblys ortalyǵyndaǵy sanaýly ǵana adamdardyń biri.
– Men týǵanymnan tek 8 paıyz ǵana kóremin, – deıdi ol. – Álemdi basqasha kórýdiń ne ekenin bilmeımin. Men kez kelgen adam sekildi óz jumystarymmen aınalysamyn. Kezinde matematıka pániniń muǵalimi maǵan: «Álem basqalaryna qandaı talap qoısa, saǵan da sondaı talap qoıady. Sondyqtan sen óz-ózińe joǵary talap qoıýyń kerek», degen edi. Qazir sol ustazymnyń aıtqanyn is júzine asyryp kelemin dep oılaımyn.
Seısenbide tańǵy 7:00-de D.Kárimov jalǵyz ózi velosıpedke otyryp, Qaraǵandydan Almatyǵa attandy. Onyń esepteýinshe, ol 5-6 kún jol júrýi tıis. Ol shatyrda túneýdi josparlaýda. О́zimen birge velosıpedti jóndeıtin saımandaryn, qaptósek, bal, jańǵaqtardan jáne keptirilgen jemisterden quralǵan taǵamdyq qospa alǵan.
– Tamaq pen sýdy joldan ala salamyn, onda turǵan esh qıyndyq joq dep oılaımyn, – dep josparlarymen bólisti ol. – Ash qalmasym anyq. Meniń alys qashyqtyqqa velosıpedpen saıahattaǵan dostarym jolda júrgizýshiler toqtap, sý men tamaq beretinin aıtty. Alaıda, kólikpen jetkizip salýdy usynsa, bas tartamyn. Men barlyq jolymdy tek velosıpedpen ótýdi kózdep otyrmyn.
Damır Kárimov úshin bul – alǵashqy alys saıahat. Osyǵan deıin ol ári barsa 120 shaqyrym qashyqtyqqa shyqqan eken. Almatydan saıahatshy poıyzben oralýdy josparlap otyr.
Mıras ASAN, «Egemen Qazaqstan»
Qaraǵandy oblysy