Ekijaqty kezdesý barysynda taraptar iri ınfraqurylymdyq jobalardy iske asyrý salasyndaǵy ózara tıimdi yntymaqtastyqtyń birqatar ózekti máselelerin talqylady. EQQDB Qazaqstan Respýblıkasyna 1993 jyldan beri jalpy kólemi 7,3 mlrd eýrony quraıtyn 222 jobany qarjylandyrǵan.
EQQDB Energetıka jáne tabıǵı resýrstar jónindegi basqarýshy dırektory Nandıta Parshadtyń pikirinshe, atalǵan banktiń Qazaqstan ekonomıkasyna búginge deıin salǵan 7,3 mlrd eýronyń 40 paıyzy energetıka salasyna, sonyń ishinde dástúrli qýat kózderine ınvestısııalansa, sońǵy kezderi eldiń balamaly energııa kózderine de bul bank qarjy bóle bastaǵan. Atap aıtar bolsaq, bank búginge deıin Ekibastuzdaǵy jel elektr stansııasy men Býrnoe elektr stansııasyn qarjylandyrǵan. Qos stansııada 50 MVt qýat shyǵarýǵa qaýqarly. Eki jobaǵa bank shamamen 150 mln dollar bólgen.
G.Ábdiqalyqova Memleket basshysynyń halyqaralyq qarjy ınstıtýttarymen yntymaqtastyqqa erekshe mán beretinin atap ótti.
Memlekettik hatshy bank ázirlegen EQQDB-nyń 5 jylǵa arnalǵan Qazaqstandaǵy yntymaqtastyqty damytý strategııasynyń memlekettik jáne jeke sektordyń rólin retteý, qarjy kózderine qoljetimdilikti keńeıtý, bank sektoryn kúsheıtý jáne jergilikti kapıtal naryǵyn damytý, óńiraralyq is-qımyldy jáne halyqaralyq ıntegrasııany kúsheıtý, jasyl ekonomıkaǵa kóshýdi jedeldetý sııaqty salalarda ózara tıimdi yntymaqtastyqtyń ornaǵany aıtyldy.
Taraptar ekijaqty áriptestiktiń qazirgi deńgeıin joǵary baǵalaı otyryp, tabıǵı resýrstar men energetıka sektoryndaǵy EQQDB jobalaryn iske asyrý máselelerin, sonyń ishinde genderlik teńdik jáne áıelderdiń osy sektordaǵy rólin arttyrý máselelerin talqylady.
Sondaı-aq, Qazaqstan Respýblıkasy Úkimeti men EQQDB arasyndaǵy kelisim sheńberinde «Áıel bızneste» atty joba iske asyrylyp jatqany aıtylyp, búginde osy joba boıynsha 7 myńnan astam shaǵyn jáne orta bıznes sýbektilerine 5,8 mlrd teńge kóleminde qaryz berilgeni tilge tıek etildi. Qarjylandyrýdan bólek, atalǵan bank bıznestegi jańa tehnologııalardyń ıgerilýin qamtamasyz etý jolynda da jumys isteıdi.
Baýyrjan MUQANOV,
«Egemen Qazaqstan»