Bul týraly búgin elordada ótip jatqan ShYU-ǵa múshe memleketter basshylary keńesiniń keńeıtilgen otyrysynda QR Prezıdenti Nursultan Nazarbaev aıtty, dep habarlaıdy QazAqparat.
«Bizdiń uıymymyz aıasyndaǵy ekonomıkalyq kooperasııalardy ilgeriletý máselelerine aıryqsha nazar aýdarý mańyzdy. Ol úshin jańa ınstıtýttyq múmkinshilikter qurylýda. Birinshiden, ShYU-ǵa múshe memleketter Úkimetteriniń arasynda halyqaralyq avtomobıl tasymaly úshin jaıly jaǵdaı jasaý týraly kelisim kúshine endi. Bizdiń elderimizdiń tranzıttik-kóliktik áleýetin ashý da ázirlenip jatqan ShYU joldaryn damytý baǵdarlamasyna septigin tıgizetin bolady», – dedi Elbasy.
Ekinshiden, Qazaqstan Prezıdenti EAEO men Jibek joly ekonomıkalyq beldeý jobalaryn túıindestirýdi eskere kele óńirlik saýda-ekonomıkalyq yntymaqtastyq kelesheginiń zor bolaryna senimdi ekendigin aıtty. Bul rette Qazaqstanda «Nurly jol» ulttyq baǵdarlamasy men Jibek joly ekonomıkalyq beldeýin túıindestirýdegi yntymaqtastyq josparynyń qarqyndy júzege asyrylyp jatqandyǵyn atap ótti.
«Úshinshiden, ózara saýda kóleminiń artýy bolashaqta ShYU-nyń erki saýda aımaǵyn qurýǵa septigin tıgize alady. Bul jerde bizdiń elderimiz ekonomıkalyq ózara is-qımyl salasyndaǵy ózderin qyzyqtyratyn jobalardy zerdeleýdi bastaý arqyly kezeń-kezeńimen ilgerileı alady. Munan bólek, bizdiń qyzmetimizdiń mańyzdy vektory mádenı-gýmanıtarlyq yntymaqtastyq sanalady. Bul turǵyda ShYU ýnıversıtetin qurý jáne jumysyn jolǵa qoıý týraly kelisimge qol qoıýdy qoldaımyz», – dedi QR Prezıdenti.
Munan bólek, Nursultan Nazarbaev ShYU-ǵa múshe memleketterdiń 2017-2018 jyldarǵa arnalǵan týrızm salasyndaǵy yntymaqtastyq baǵdarlamasyn uıymdastyrýdaǵy birlesken is-qımyl josparyn qabyldaý atalǵan saladaǵy ózara is-qımylǵa tyń serpin beretindigin atap ótti.