Kórme zalyna 50-ge jýyq arheologııalyq buıymdar: sazdan jasalǵan jaýyngerler, qarý-jaraqtar, ydys-aıaq, altyn jáne kúmis áshekeıler qoıylǵan.
- «Sın Shıhýandı ımperatordyń Terrokat áskeri» kórmesi Ortalyq Azııaǵa alǵash ret kelip otyr. Astanada EKSPO kórmesi ótkizilip jatqandyqtan óz mádenıetimizdi tanytqymyz keldi. Bul qadam Qazaqstan men Qytaı arasyndaǵy mádenı yntymaqtastyqtyń odan ári nyǵaıýyna altyn kópir bolatynyna senimdimin, - dedi Shensı pravınsııasynyń mádenı jádigerler basqarmasynyń dırektory Chjao Rýng jýrnalıstermen kezdesýinde.
Tolyq ólshemdi sazdan jasalǵan 8099 qytaı jaýyngeriniń jáne olardyń attarynyń músinderi Sıan qalasyndaǵy Sın Shıhýandı ımperatorynyń kesenesi janynan 1974 jyly tabylǵan. Jaýyngerlerdiń músinderi jeke-jeke tártippen jasalǵan ári árqaısysynyń keskini, bet-álpetteri qaıtalanbaıdy. Zertteýshiler Terrakot áskeri b.z. deıingi 210-209 jyldary ımperatordyń arnaıy buıryǵymen daıyndalǵanyn dáleldegen. Búginde Eskertkish IýNESKO-nyń Búkilálemdik muralar tizimine engizilgen.
- Sın patshalyǵynyń tusy – Qytaı ımperııasy tarıhyndaǵy eń jarqyn kezeńderdiń biri. Ekonomıka, mádenıet, ózge eldermen baılanys turaqty damydy. Sol sebepten qazaqstandyqtar Qytaıdyń mádenıeti jaıynda tereńirek bilýi úshin Sın Shıhýandı ımperatordyń Terrokat áskeri arqyly biz tarıhymyz jaıly keńirek aıtqymyz keledi, - dedi Chjao Rýng myrza.
Búgingi deıin «Terrakot áskeri» álemniń 40-qa jýyq elin aralap, 80-nen astam kórme uıymdastyryldy. Qundy jádigerler Ortalyq Azııaǵa tuńǵysh ret jetkizildi. Qazaqstanmen birge kórme Germanııa jáne AQSh-te ótkizilýde.
Elorda turǵyndary men qonaqtary Sın Shıhýandı ımperatordyń Terrakot áskerlerin QU Ulttyq murajaıynda 9-maýsymnan 10-qyrkúıekke deıin kún saıyn tamashalaı alady.