Meımandos megapolıs

Bálkim, solardyń birazy qoǵamnyń ilgeri damýyn qalaıtyn izgi nıetti adamzat balasynyń ortaq ıgiligine aınalar. Talaılardy tańdandyrǵan tamasha ıdeıa­lar kúndelikti tirshiligimizden kórinis tabar. Áıteýir, kóbine kóktegini kókseıtin kóńilimizde úkilegen úmit kóp. Olaı bolsa, aıymyz ońynan týyp, adaldyqtan aınymas aq júrektiń arman-ańsaryndaı maqsat-murattarymyz bizdi alǵa jeteleı bergeı.  Endi ejelgi Esil jurtta jaınaǵan jas elordamyzǵa alys-jaqynnan aǵy­latyn aǵaıynǵa beıbitshiliktiń besi­gin terbetken berekeli el ekenimizdi kórsetkenimiz abzal. Babadan mıras baı dástúrimiz boıynsha esigimizden engen qadirli qonaqtarymyzdy qushaq jaıa qarsy alýymyz qajet.  Qabaqtaryna qaıaý túsirmeı qaıta­rýy­myz kerek. Olar erteń otandaryna oralǵanda qonaqjaı halqymyzdyń ystyq yqylasyn emirene eske alyp jatsa, bir ǵanıbet emes pe?! О́rkenıet shyńyna ór­melegen táýelsiz Qazaqstan týraly ja­ǵymdy pikirlerdiń jaıylýyna mundaı shartaraptyq sharalardyń da septigi tıetini belgili. Aqordaly Astana – meımandos megapolıs. Shýaqty shaharymyzǵa kelip-ketýshiler qımastyqpen arttaryna qa­raılaı-qaraılaı attanady. Eń bas­tysy, bári onyń damý dınamıkasyna tań­daı qaǵyp, arýdaı sylanǵan ajaryna súısinedi. Adamdarynyń pák peıiline rızashylyqtaryn bildirip jatady. Al­qaly jıyndarǵa arnaıy shaqyrylǵan sarabdal saıasat serkeleriniń de, Nobel syılyǵyn alǵan ǵulama ǵalymdardyń da, dúnıejúzilik dúbirli dodalarda top jarǵan sańlaq sportshylardyń da, óreli ónerimen kórermen kóńilin jaýlaǵan áıgili ártisterdiń de aǵynan jaryla Astana jaıynda jaǵymdy pikir aıtqandaryn eki kúnniń birinde kóz kórip, qulaq estip júr.  Bes qurlyqqa belgili bedeli bar El­basymyz Nursultan Nazarbaevtyń eren eńbegi arqasynda aıbyny asqaq­taǵan Astana asa mańyzdy halyq­ara­­lyq máseleler talqylanatyn taǵ­dyr­­shesh­ti basqosýlardyń alańyna aınal­dy. EQYU-nyń sammıti, Álem­dik jáne dástúrli dinder kósh­basshylarynyń sez­deri, ekono­mı­ka­lyq forýmdar, arazdas­qandarǵa ara­ǵaıyndyq jasaý baǵy­tyn­daǵy kelis­sózder uıymd­astyrý proses­terin eske túsirsek, elor­da­myzdyń aınalasyna tatý­lyq aýrasyn ta­ratatyn erekshe rólin erik­siz moıyndaısyz.  Aldaǵy úsh aıda eldigimiz synalar taǵy bir emtıhan tapsyrmaqpyz. Mereıli memleketimiz oǵan meılinshe ázirlengeni álemge aıan. Sondyqtan, irgeli iste irkilis bolmasyna senim mol. Endeshe, ne turys?! EKSPO meımandaryn ádemi áserge bóleıtin ártúrli baǵdarlamalarymyzdy bastamaımyz ba? Osy oraıda Mádenıet jáne sport mınıstrligi tarapynan utym­dy sharalar uıymdastyrylmaq eken. Elimizdegi eń tanymal óner orda­lary, jekelegen sahna juldyzdary toqsan kúndik torqaly toıdyń kórkin kirgizbek. Maqtan tutar mańdaıaldy teatrlarymyz spektaklderin kórsetip, operalaryn qoıyp, baletterin bıleıdi. Dástúrli ánderimiz dáriptelip, shalqyma kúılerimiz sharyqtaıdy. Mýzeılerimiz ben konsert zaldarymyz esikterin kelýshilerge aıqara ashyp tastaıdy. Daýysy kókte damyldaıtyn Dımashymyz talǵamy jo­ǵary sheteldikterdi taǵy da tamsandyryp, qulaq quryshtaryn qandyratyn bo­lady. О́ńirlerden keletin ónerpazdar da al­qalaǵan áleýmettiń aldynda aıanyp qal­masy anyq.  Qaladaǵy «Qazanat» ıppodromynda ulttyq sport oıyndarynyń kórigi qyzady. Uly dalanyń ulandary at jalynda atoılap, dúıim jurttyń delebesin qozdyrmaq. «Qyz qýý», «Teńge ilý», «Jam­­by atý», «Aýdaryspaq» deısiz be, qan qyzdyrar qaptaǵan qyzyqtyń bári osynda. Sondaı-aq, salbýrynshyl saıat­shylarymyz qyrdyń qyzyl túlkisine qus salyp, ıt júgirtip ań aýlaýdyń úzdik úlgilerin usynbaq.  Al kóshpendiler órkenıettiń kórme­sindeı elordadaǵy Etnoaýyldyń tamashalaryn aıtyp taýysa almaısyń. On eki qanat aq ordany aınala tigilgen kıiz úılerdiń ishi kirseń shyqqysyz. Qolónershiler aýyly alystan men­mundalaıdy. Shyn sheberlerdiń qolynan shyqqan zergerlik buıymdar ótken tarıhty qaıta tiriltýimen qymbat. Ásirese, áıelderdiń áshekeı buıymdary kózdiń jaýyn alady. Toqylǵan kilem, basylǵan kıizdiń túrli-tústi oıýlary da amalsyz nazar aýdartady. Qyrmyzydaı qulpyrǵan qyzyl qamzoldy qyzdar beti­ńizge qarap ántek jymııa, qazaqsha, oryssha, aǵylshynsha til qatyp, qalaǵan jaǵyńyzǵa jón silteıdi.   EKSPO pavılondaǵylar bizge «evrı­kalarǵa» laıyq erek joba-josparlaryn usynsa, biz olarǵa óz elimizdiń ónegeli tarıhyn tanytyp, san ǵasyrlyq salt-dástúrimizdi jáne basqa da ulyqtaýǵa tatıtyn ulttyq qundylyqtarymyzdy kórsetip qalsaq, quba-qup. Kórsin, arda qazaqtyń áriden jeli tartqan altyn arqaýynyń áli úzilmegenin!

Talǵat BATYRHAN, «Egemen Qazaqstan»