«Otyrar sazy» orkestri ulttyq aspaptarymyzdyń asa baı túrlerimen tanysýǵa múmkindik beretin birden-bir orkestr. Orkestrde dombyra men qobyzdan basqa baǵa jetpes mádenı mura bolyp esepteletin jetigen, sherter, shańqobyz, mesqobyz, syrnaı men sazsyrnaı, sybyzǵy men asataıaq, daýylpaz, tuıaqtas qońyraý, qaıraq ún qatady. «Otyrar sazynyń» negizin qalaýshy – Halyq qaharmany, KSRO halyq ártisi, Memlekettik syılyqtyń laýreaty, kompozıtor Nurǵısa Tilendıev edi. Mýzyka ónerinde qaıtalanbas iz qaldyrǵan tulǵa orkestrdi biregeı shyǵarmashylyq ujymǵa aınaldyra bildi. Búginde ujymǵa N.Tilendıevtiń qyzy, Qazaqstannyń eńbek sińirgen qaıratkeri Dinzýhra Tilendıeva jetekshilik etedi. Al orkestrdiń dırıjerleri – Qazaqstannyń eńbek sińirgen ártisi Jalǵasbek Begindikov pen Músilim Ámze. Orkestr tek óz elimizde ǵana emes, álemniń kóptegen elderinde konsert ótkizip júrgen tańdaýly ujymdardyń qatarynda. Astanada ótken konsertke de «Otyrar sazynyń» mol daıyndyqpen kelgeni kórindi. Qazaqstannyń eńbek sińirgen qaıratkerleri Jámıla Serkebaeva, Jámıla Baspaqova, Gúlzııa Stambek, Larısa Nasretdınovalar, sondaı-aq, Halyqaralyq baıqaýlardyń laýreattary Baqtygúl Bısembaeva, Farhad Kýbıev, Nursultan Shatyrhanuly konsertte qazaq jáne shet el kompozıtorlarynyń shyǵarmalaryn oryndady.
Aıgúl SEIILOVA, «Egemen Qazaqstan»