Myqtynyń mysy basty

Danııa quramasy bizdiń komandany tymaqpen uryp aldy dep aıtýǵa aýyz bar­maıdy. Birinshi taımda Qazaq eliniń quramasy ózinen sheberlik deńgeıi áldeqaıda joǵary  ujymǵa qarsy teń dárejede óner kórsetti. De­gen­men, qonaqtardyń shabýyly jıi ári qaýiptirek boldy. Sonyń aıǵaǵyndaı, matchtyń 27-mınýtynda dat shabýylshysy Nıkolaı Iorgenson esep ashty. Biz­­diń fýtbolshylardyń esepti teńestirer birneshe múm­kindigi bolǵan. Biraq, shabýyldy túıindeıtin she­shýshi sátke kelgende oıyn­shylarymyzdyń oılaǵany iske aspaı-aq qoıdy.  Birinshi taımnyń bi­týine eki mınýttaı ýaqyt qalǵanda quramadaǵy kósh­basshy oıynshylardyń biri Baýyrjan Islamhan dóreki oıyny úshin  alań­nan qýyldy. Maqtap júr­gen kapıtanymyz áýe­de bolǵan dop úshin talas­ta dat oıynshysy Vıl­lıam Kvıstiń jaǵynan shyn­taǵy­men urǵan edi.  Kapıtany qýylyp, adam sany kemip qalǵannan keıin Qazaqstan quramasynyń oıynynan mán ketti. Bul azdaı-aq,  kezdesýdiń 50-mınýtynda qorǵaýshylarymyz óz aıyp alańynda Iýssýf Poýlsenge qarsy tártip buzyp, tóreshi bizdiń qaq­paǵa 11 metrlik aıyp do­byn belgiledi. Krıstıan Erıksen penaltıden múlt ketpedi. Reseılik tóreshi Vladıslav Bezborodovqa artar ókpe joq. Sheshiminiń bári de daý týdyrmaıtyndaı ádiletti bolǵan edi.  Negizi, Danııa fýtbol­shylarynyń bizdiń qaqpaǵa dopty qarsha boratarlyq talaı múmkindigi boldy. Biraq ábúıir bolǵanda, soqqylardyń kóbi qaqpadan qıys ketip jatty, keıbirine qaqpashymyz Lorııa tos­qaýyl qoıa bildi.  Eki dop engizip, kóńilderi jaılanǵan soń qonaqtar sál bosańsyp, sylbyrlyq tanytqan sáttiń birinde Islambek Qýat qarsy qaq­padan sańylaý taýyp, jaýap gol soqqan bolatyn. Biraq bul qýanysh uzaqqa barmady. Alańǵa oıynshy almastyryp shyqqan Kas­per Dolberg oıynnyń 81-mı­nýtynda eseptegi eki gol aıyrmashylyqty qaıta qalpyna keltirdi. Jalpy, bul oıynda bizdiń Lorııa qorǵaǵan qaqpa torynda alty birdeı dop týlaǵan bolatyn. Alaıda, onyń úsheýin tóreshi oıyn­nan tys soǵyldy dep sa­namaı tastady.  Obaly neshik, bizdiń fýtbolshylar oıynshy sa­ny­nyń azdyǵyna qara­mastan, namysqa tyrysyp, azý kórsetip baqty. Biraq ta, deńgeıi joǵary qarsylastyń aldynda qajyr-qaırat hám tehnıkalyq turǵyda óziniń álsizdigin amalsyz moıyndady. Sonymen, reseılik maman Aleksandr Borodıýk baptaǵan Qazaqstan quramasy qatarynan úsh oıynda jeńilistiń ashy dámin tatty.   Endi, Qazaq eliniń fýtbolshylary irikteý týr­nırindegi kelesi oıyn­dy 1 qyrkúıek kúni Cher­nogorııa ko­man­dasymen óz ala­ńyn­da ótkizedi. Atalǵan qar­sylaspen arada ótken birinshi kezdesýde bizdiń fýtbolshylar 0:5 esebimen oısyraı utylǵan bolatyn. Qazaqstan – Danııa – 1:3 (0:1) Nıkolaı Iorgensen, 27 (0:1). Krıstıan Erıksen, 50   penaltı (0:2). Islambek Qýat, 76 (1:2). Kasper Dolberg, 81 (1:3).

Qaırat ÁBILDINOV, «Egemen Qazaqstan»