Taqtanyń saltanatty ashylýyna marqumnyń týystary, ardagerler, jastar men jeke quram qatysty. OIID bastyǵy, polısııa general-maıory Berik Bilálov Alekseı Sherbakovtyń ómir joly men janqııarlyq erligi óskeleń urpaq úshin úlgi bolyp qala beretinin jetkizdi.
«Ákem týraly sýyq habar kelgende 18 jasta edim. Onyń qandyqol qaraqshynyń qolynan birneshe jaraqat alǵanyn keıin bildim», deıdi qyzy Natalıa Alekseevna.
Alekseı Sherbakov oblys ortalyǵyndaǵy qylmys kóp jasalatyn Dobrolıýbov polısııa beketinde aǵa ýchaskelik ınspektor qyzmetin atqaryp júrgende otbasylyq janjal bolyp jatqan týraly sýyt habar alady. Buryn eki ret sottalǵan janjalqoı sýyq qarýmen qarýlanyp, áıeli men kórshilerine jaraqat keltirgen. Maıor úıge kire bergende ótkir ustaramen tamaq tusynan oryp jibergen. Buǵan deıin Shkodınniń jeke tártibine baılanysty birneshe ret kelgendikten, mundaı qarsylyq kútpese kerek. Qansyrap jatsa da áriptesteri kelgenshe qylmyskerdi jibermegen. Aýyr dene jaraqatynan 42 jastaǵy mılısııa maıory aýrýhanada kóz jumǵan.
«Jeke erligi úshin» ordeniniń ıegerin jerlesteri maqtan tutady. Esil er Aqaıyń aýdanynda týyp-ósken. Memorıaldyq taqtanyń saltanatty ashylýyna Stavropol ólkesinen Alekseı Sherbakovtyń nemeresi de keldi.
Aýdan ákimi Dáýren Baıtóleshov ýchaskelik ınspektorlarǵa zamanaýı kompıýterlik tehnıkalar tabystady.
Meımandar Astrahanka selosyndaǵy ýchaskelik polısııa pýnktinde bolyp, jergilikti polısııanyń jumysymen tanysty.
О́mir Esqalı, «Egemen Qazaqstan»