Konferensııa qatysýshylarynyń aldynda sóılegen sózinde Baqytjan Saǵyntaev kezdesýdiń «Bolashaq energııasy» taqyrybyndaǵy EKSPO-2017-niń ashylý kúnderine oraı uıymdastyrylýynyń mańyzyn atap ótti. QR Premer-Mınıstri Astanada ózderiniń ınnovasııalyq ıdeıalary men tehnologııalaryn usynǵan kórmege qatysýshy barlyq elder men halyqaralyq uıymdarǵa alǵys bildirdi.
QR Premer-Mınıstri Baqytjan Saǵyntaev Memleket basshysy Nursultan Nazarbaevtyń Qazaqstannyń qarqyndy damýshy, álemdik energetıkanyń uzaq merzimdi ári turaqty damýyn qamtamasyz etý strategııasyn ustanatyn memleket retinde qalyptasýyndaǵy erekshe rólin atap ótti.
B. Saǵyntaev Mınıstrlik konferensııa men Segizinshi forýmnyń BUU-nyń bes О́ńirlik komıssııasynyń qoldaýynyń arqasynda ótkizilgenin aıtty. Atalǵan jumystyń nátıjesi energetıka salasyna qyzyǵýshylyq tanytqan barlyq taraptardyń uzaq merzimdi yntymaqtastyǵyn nyǵaıtý bolady. Konferensııa deklarasııasynyń erejeleri «EKSPO-2017 qundylyqtarynyń úndeýhatyna» engiziledi.
Turaqty damý energetıkasy jónindegi segizinshi halyqaralyq forým men «Energetıkanyń turaqty damýyn qamtamasyz etý» Mınıstrlik konferensııasynyń negizgi taqyryptary energetıkalyq qaýipsizdik, saýda jáne ınfraqurylym, energııa, klımat jáne azyq-túliktiń ózara baılanysy, sonymen qatar jańǵyrtylatyn energetıkany óńirlik turǵydan damytý bolyp tabylady.