«Astana EKSPO-2017» halyqaralyq kórmesi sheńberindegi «Atom energııasynyń álemi» pavılonynda «Qazatomónerkásip» UAK» AQ men Cameco Corporation, Uranium One Inc., CGN jáne AREVA kompanııalary arasyndaǵy memorandýmdarǵa qol qoıyldy.
Tórt birdeı qujat Qazatomónerkásiptiń Elbasy N.Á. Nazarbaevtyń «Qazaqstannyń úshinshi jańǵyrýy: jahandyq básekege qabilettilik» Joldaýynda aıtylǵan jáne «Sıfrlyq Qazaqstan» memlekettik baǵdarlamasy aıasyndaǵy mindetterdi júzege asyrýdaǵy yntymaqtastyq múmkindikterin belgileıdi. Taraptar birlesken kásiporyndardaǵy avtomattandyrý, sıfrlandyrý jáne robottandyrý salasyndaǵy yntymaqtastyqqa, atap aıtqanda, Big Data, zattar ınterneti, addıtıvtik tehnologııalar, 3D úlgileý jáne bultty tehnologııalar jónindegi jobalardy ázirleýge nıetti. Budan bólek, memorandýmdar birlesken semınar, forým, tájirıbe almasý maqsatymen taǵylymdamalar ótkizýdi de qarastyrady.
«Memleket basshysy óz Joldaýynda ónerkásip pen óndiristi sıfrlandyrý relsine ótkizý qajettigin atap ótti, búgingi memorandýmdar – sol tapsyrmanyń is júzinde oryndalýynyń kórinisi. Sondyqtan bizdiń barlyq kásiporyndarymyz sıfrlandyrýǵa kóshedi, robottandyrý elementterin qoldanyp, mol derekterdi taldaý arqyly jumys júrgizetin bolady», - dedi Qazatomónerkásip Basqarma tóraǵasy Asqar Jumaǵalıev.
Qazirgi kezde ulttyq atom kompanııasy «Indýstrııa 4.0» tujyrymdamasyn iske asyrý boıynsha belsendi jumystar atqaryp keledi. Naqty aıtqanda, Qazatomónerkásipte ýran óndirisiniń negizgi baǵyttaryn keshendi avtomattandyrý júrip jatyr. «Indýstrııa 4.0» úshin tuǵyrnama bolatyn Sıfrlyq kenish, ERP (kásiporyn resýrstaryn josparlaý), Josparlaýdyń biriktirilgen júıesi, Jaǵdaıattyq ortalyq jobalary iske qosylǵan.
«Qazatomónerkásip-SaUran» enshiles kásipornynda daıyn ónimdi ydysqa salý tarmaǵyn robottandyrý prosesi qolǵa alyndy. Ýran ónimin ydysqa salýdy, ólsheý jáne jóneltýdi endi qyzmetkerler emes, robottandyrylǵan keshen atqaratyn bolady. «Indýstrııa 4.0» negizgi quramdas bólikteriniń biri – Zattar ınterneti (elektrondy qondyrǵylardyń adam qatysýynsyz ózara árekettesý prınsıpi). Barlyq naqty óndiristik kórsetkishter jabdyqtardaǵy habarshylar kómegimen kompanııanyń bas keńsesine kelip túsedi. Bul óndiristegi adamdyq faktordy boldyrmaı, rastalǵan derekter alýǵa jáne prosesterdiń avtonomdyǵyn qamtamasyz etýge múmkindik beredi. О́ndiristik ýchaskeler ózara árekettesip, tapsyrystardy qalyptastyrady, ólshemderdi túzetip, normatıvterdi retteı alady.