Hunan Television Qytaıdaǵy kórsetilimi eń joǵarǵy telearnalardyń arasynda ekinshi orynda tur. Qytaı Halyq Respýblıkasynyń úlken bóligin ǵana qamtyp qoımaı, Gonkong, Makao sııaqty arnaıy ákimshilik aýdandar men Taıvan aralyna da taratylady.
Sonymen qatar, "Qazaqstan" RTRK AQ baǵdarlamalary men jobalary Mango TV ınternet arnasynda kórsetiledi dep josparlanýda.
Aıta ketsek, Mango TV óz kórermenderine kontenttiń barlyq janryn usynady. Olardyń ishinde túrli fılmder, telehıkaıalar, mýzyka, mýltfılmder jáne oıyn-saýyq baǵdarlamalar men qatar Hunan teleradıokorporasııasy men Hunan Satellite TV-diń avtorlyq baǵdarlamalary da kórsetiledi.
2016 jyldyń kórsetkishine qaraǵanda, Mango TV ınternet arnasyna 39 mıllıonnan astam belsendi qoldanýshy tirkelgen.
Eki korporasııa arasyndaǵy yntymaqtastyq sheńberinde jańa mýzykalyq jobany birlesip shyǵarý josparlanyp otyr. Maýsym aıynan bastap, tehnıkalyq-uıymdastyrýshylyq máseleler boıynsha qyzmet toptary men shyǵarmashylyq ujymnyń quramyndaǵy prodıýserler, rejısserler, operatorlar óz jumysyna kirisetin bolady.
Hunan tele-radıo habarlaryn taratý Korporasııasynyń Prezıdenti Lıýı Hýanbın "Mýzyka men telearna eki el arasyndaǵy dostyqty odan ári nyǵaıtady" dedi.
Sondaı-aq, 2018 jyldan bastap, jyl saıynǵy Halyqaralyq Taklimakan Rally» jol talǵamaıtyn motosıklder jarysynyń túsirilimi Qazaqstan Respýblıkasynyń aýmaǵynda júzege aspaq. 2005 jyldan bastap "Taklimakan Rally" Qytaıdaǵy eń bedeldi motosıklder jarysy bolyp sanalady jáne 2012 jyly Halyqaralyq avtomotosport federasııasynyń statýsyn alǵan. Bul joba qazaqstandyq kontentti Qytaı eline keńinen shyǵarýdy jáne týrızmdi damytýdy kózdeıdi.
"Atalǵan kelisimder otandyq kontentti sheteldik televızııalyq naryqqa shyǵarý úshin baǵyttalǵan. Hunan TV telearnasymen ornatylǵan yntymaqtastyq "Qazaqstan" RTRK AQ aýdıtorııasyn keńeıtýge múmkindik beredi", - dedi Korporasııa basqarmasynyń tóraǵasy Erlan Qarın.