Aqyrynda aýdan ákiminiń orynbasary qyzmetine úmitkerler arasynda osy eki aǵamyzdyń esimderi daralanyp shyǵyp, orynbasar qyzmeti úshin olardyń ortasyndaǵy kúres qyzyp beredi. Ekeýin de jaqtaýshylar qatary az emes. Tórebekti jaqtaýshylar Alǵysbekti synap-minep, Alǵysbekti jaqtaýshylar Tórebekti syn tezine alyp degendeı dabyldatyp jatqanda, bul eki aǵamyz bolyp jatqan oqıǵalardan beıhabar jandaı halyq aldyndaǵy sypaıy da syrdań qalyptaryn saqtap qalady. Bir-birimen kezdese qalǵanda aman-sálemderi de túzý, biraq ekeýi de jańa qyzmet úshin «kilem astyndaǵy» tartysty kúsheıte tússe kerek.
Aqyry tájirıbesi de, qyzmet ótili de moldaý Tórebek aǵamyz jeńiske jetip, aýdan ákiminiń orynbasary bolyp taǵaıyndalady. Astynda qyzmettik kólik paıda bolady.
Osydan kóp ótpeı-aq aǵamyz kóligine minip, keshkisin jumystan úıine qaıtyp bara jatsa, kósheden keshegi básekelesi Alǵysbek ushyrasa ketedi. Kóligin júrgizýshige dereý toqtattyra qoıyp, Alǵysbekti kólikke minýge shaqyrady. Shamasy, ekeýiniń úıi de bir mańaıda bolsa kerek.
Alǵysbek qarsy bolmaı kólikke kelip otyryp, aralarynda túk bolmaǵandaı baıaǵydaǵy tatýlyq qalyptarymen bir-birinen jón surasyp, sypaıy áńgimelesip otyrady. Úıiniń tusyna jetkende Alǵysbek aǵamyz kólikten túse berip:
– Tóke, «kilem satsań kórshińe sat, bir buryshyna óziń de otyrarsyń» dep atam qazaq taýyp aıtqan eken ǵoı. Aýdan ákiminiń orynbasary qyzmetine sizdiń taǵaıyndalǵanyńyz qandaı jaqsy boldy. Mine, ıgiligin kórip jatyrmyz, – dep alǵysyn bildiripti. Sonda Tórebek:
– Rahmet, Alke! Bári de sizderdiń arqalaryńyzda ǵoı, – dese kerek.
Sóıtip eki aǵamyzdyń arasynda bolyp ótken qyzmet úshin tartys olardyń arasyndaǵy burynǵy syılastyqqa kir juqtyrmaǵan qalypta, ózinen ózi jýylyp-shaıylyp júre berse kerek.
«Men sizden ýdy aıaıyn ba?!»
Tórebek aǵamyz aýdan ákiminiń orynbasary qyzmetin dúrildetip atqaryp jatqanda taǵy da dál osyndaı qyzmettegi Murat aǵamyzben arada jumys babynda bir kıkiljiń paıda bolyp, ol birshama ýaqytqa sozylyp ketedi. Biraq bul kıkiljińdi ekeýi de kóp jaryqqa shyǵarmaı, baıaǵydaı keıip tanytqandyqtarymen, aınalasyndaǵy qyzmettester ony baıqap qalady. О́ıtkeni, aǵalarymyzdyń bir-birimen sóılesý mánerlerinde sál ózgerister bilinedi.
Sodan kóktemgi egis jumystary bastalǵan kezde joǵary jaqtan oǵan qatysatyn sharýa qojalyqtary úshin túrli zııankestermen kúresýge arnalǵan hımııalyq dárilik zattar kelip túse bastaıdy. Murat aǵamyz óz qyzmet babyna sáıkes olardy qojalyqtarǵa úlestirip berý isine basshylyq jasaıdy.
Sol jyldary jemir shegirtkeler men qońyzdar kóbeıip ketti me eken, aýdanǵa ákelingen olardy ýlaıtyn dáriler dıqandardyń bárine birdeı jetpeýge aınalady. Solardyń qatarynda Tórebek aǵamyzdyń bir tanysy da bolyp, ol Tókeńnen kómek kórsetýin surap, qaıta-qaıta mazasyn ala bergen soń aqyry ol Muratqa kelip:
– Múke, álgi shegirtkege qarsy taratyp jatqan ýlaryńyzdan qalyp pa edi, maǵan da sol ýdyń azdap qajet bolyp turǵany, – dese:
– Oıbaı-aý, Tóke! Siz ózińiz kelip ý surap tursańyz, men sizden ony aıaıyn ba?! Alyńyz, Tóke, alyńyz! – dese kerek Múkeń.
Suńǵat ÁLIPBAI,
«Egemen Qazaqstan»