«Byltyr oblys boıynsha 164 myń sharshy metr turǵyn úıdi paıdalanýǵa berildi. Bıylǵy meje – 200 myń sharshy metr. Bul salaǵa erekshe basymdyq beriletin bolady. Qarjylyq jaǵynan tolyq qamtamasyz etiledi», dedi Qumar Irgebaıuly.
Jambyl kóshesinde boı kóteretin «Jas órken» shaǵynaýdanynyń joba úlgisinde aýmaqty jańa nysandarmen qamtý, gúlzarlarmen kórkeıtý, eski ǵımarattardyń qasbetin jaqsartý sharalary qarastyrylǵan. Jol-kólik jóndeý jumystary aıaqtalǵannan keıin aınalma joldyń dál júrek tusyna batyr babamyz Qojabergen jyraýǵa arnap eńseli eskertkish ornatylady. Onyń bıiktigi 14 metrge deıin jetedi. Budan tysqary óndiristik aýmaqtaǵy qorshaý boıyna aǵashtar men tiri butaly qorshaý egý arqyly shaǵyn gúlzarmen kórkeıtiledi, jaıaýjoldar jasalady, shamdar men oryndyqtar ornatylady. Jekelegen nysandardyń qasbetteri sáýletkerlik áınekteýdi qoldaný arqyly keramıkalyq mármártaspen kómkeriledi. Osy aýmaqtaǵy kóshelerdiń oramy aýmaǵynda 384, 312 jáne 332 páterlik turǵyn úı kesheni turǵyzylady. Qazir 4 qabatty tennıs ortalyǵy men 9 qabatty prokýratýra ǵımaratynyń qurylysy júrgizilýde.
Keńeste Oqýshylar saraıy ǵımaratynyń jobasy tanystyryldy.
«Ǵımarat tórt qabatty bolady, ol 13,5 myń sharshy metrdi quraıtyn 5 bloktan turady, 1800 balaǵa laıyqtalǵan. Úıirmelerge arnalǵan 40-tan astam kabınet, 4 sheberhana, 8 zerthana, 3 kórme zaly bolady. Budan basqa konsert, art jáne konferensııa zaldary, medıateka, murajaı, tiri burysh pen dybys jazý stýdııasyn salý qarastyrylǵan», dedi sáýlet jáne qala qurylysy basqarmasy basshysynyń mindetin atqarýshy Jasulan Qabıev.
О́ńir basshysy Oqýshylar saraıynda IT-ortalyǵy ornalasatynyn aıtty.
«Kóptegen elderde IT-óndirisi aýyl sharýashylyǵynda keńinen paıdalanylady. Mysaly, Gennadıı Zenchenkonyń mal sharýashylyǵynda kóptegen úrdister kompıýterlendirilgen. Qazir ósimdiktiń ósýin, ózin qalaı sezinetindigin jáne qandaı preparattar qajet ekendigin baqylaıtyn tehnologııalar bar. Bul jerde jańa tehnologııalardy tereń meńgergen jas mamandar jumys isteıtin bolady. Aýyl sharýashylyǵy, qalalyq jaryqtandyrý, taǵy basqa máselelerdi talqylaıtyn alań jasaımyz», dedi Qumar Aqsaqalov.
О́mir Esqalı, «Egemen Qazaqstan»