Osy jyldyń 29 mamyry men 3 maýsymy aralyǵynda atalǵan shaharda «Beıbitshilik álemi» halyqaralyq birlestiginiń uıymdastyrýymen «Antalııa-2017» atty halyqaralyq Dostyq festıvali men ǵylymı konferensııa ótken-di. Konferensııaǵa qatysqan Ulan aýdanynyń Qasym Qaısenov kentindegi balalar mýzyka mektebiniń dırektory Baqytjan Ahanova úzdik ǵylymı baıandamasy úshin 1 dárejeli dıplommen marapattalyp, «Beıbitshilik álemi-Korona» medaliniń ıegeri atandy. Sonymen qatar, atalǵan mýzyka mektebiniń úsh muǵalimi Larısa Qanapına, Serik Nursultanov pen Larısa Arsabıevaǵa arnaıy tósbelgi tapsyryldy.
«Dostyq festıvaline bizdiń mektebimizden 7 oqýshy qatysty. Barlyǵy da bas júldemen oraldy. «Shapaǵat» bı ansambli nemis bıi «Polkany» jáne ózbek halqynyń bıin bılep, bas júlde alsa, «Jiger» dombyrashylar ansambli Jaıymovtyń «Shalqyma» kúıin, «Ulan» dýeti Qurmanǵazynyń «Balbyraýyn» kúıin oryndady. Jeke oryndaýda Aısulý Muqasheva S.Qusaıynovtyń «Mereke» kúıin, Esengeldi Erasyl N.Chaıkınniń «Derevnıa syrtynda», Ákejan Ánýarbekov A.Mosarttyń «Túrik marshy» týyndysyn kórermen nazaryna usyndy. Festıvalǵa qatysqan muǵalimder men oqýshylarymyz 2017 jyldyń 30 qazan – 3 qarasha aralyǵynda Birikken Arab Ámirlikteriniń Dýbaı qalasynda ótetin «Dýbaı-2017» halyqaralyq Dostyq festıvali men ǵylymı konferensııasyna shaqyrtý aldy», deıdi mýzyka mektebiniń dırektory Baqytjan Ahanova.
Azamat QASYM, «Egemen Qazaqstan»
Shyǵys Qazaqstan oblysy, Ulan aýdany