Grýzııa memleketiniń ulttyq kúniniń ashylý saltanaty Qazaqstan jáne Grýzııa memleketteriniń ánurandaryn oryndaýmen bastaldy. Sodan keıin sahnaǵa Grýzııanyń Bas komıssary, energetıka mınıstriniń orynbasary Ilıa Eloshvılı shyǵyp, quttyqtaý sóz sóıledi. Ol óz sózinde eki el arasyndaǵy ýaqytpen shyńdalǵan dostyqty tilge tıek ete kelip, Astanada ótip jatqan álemdik kórmeniń máni men mańyzyna toqtaldy. Odan ári ol óz sózinde Grýzııa ulttyq pavılonynyń taqyryby «Energııa kózi – adamdar» dep atalatyndyǵyn, óz elinde bul kórmege degen qyzyǵýshylyqtyń joǵary bolǵandyǵyn atap kórsetti. Grýzııa «Astana EKSPO-2017» kórmesine qatysýyn rastaǵan alǵashqy memleketterdiń biri boldy. Sońǵy derekter boıynsha Astanadaǵy kórmege Grýzııadan 10 myńnan astam adam keledi dep kútilýde. Grýzııa Ulttyq kúniniń ashylý saltanatyna Grýzııa Prezıdenti Georgıı Margvelashvılı bastaǵan úlken resmı delegasııa kelip qatysty.
Ulttyq kúnniń ashylý saltanaty Grýzııadan arnaıy kelgen óner sheberleriniń konsertine ulasty. Grýzın halqynyń ulttyq mýzykasy, bıi men folklory búkil álemge tanymal. О́ner sheberleriniń konserti jınalǵan kórermendi beı-jaı qaldyrmady. Sahnada Tbılısı memlekettik orkestriniń súıemeldeýimen ataqty ánshiler Nanı Bregvadze, Tamara Gverdsıtelı, Ekı Mamaladze án shyrqady. «Energııa kózi − adamdar» dep atalatyn Grýzııa pavılony 500 sharshy metr alańǵa ornalasqan. Pavılondaǵy jádigerler osy eldiń energetıkalyq áleýetimen tanystyryp, sý, jel, kún jáne basqa jańǵyrmaly energııa kózderi arqyly elektr qýatyn óndirýdegi kóptegen ozyq tehnologııalardy dáripteıdi. Sonymen birge, Grýzııa pavılonynda qolóner jármeńkesi ashylǵan. Toqyma, zergerlik buıymdar, keramıka, tiginshilik, shyny, emal jáne sazdan jasalǵan qolóner buıymdary kórmege kelýshilerge kóptep usynylady. Osyndaı mazmundy ári qyzyqty baǵdarlamamen órilgen Grýzııa memleketiniń kórmedegi Ulttyq kúni erekshe tartymdy ótti.
Jylqybaı JAǴYPARULY, «Egemen Qazaqstan»