Soǵan oraı qalada Dostyq sherýi ótti, sonymen qatar halyqtar birliginiń belgisi retinde Glınka atyndaǵy opera jáne balet teatrynyń aldyndaǵy alańǵa aǵash otyrǵyzyldy.
Dostyq sherýinen keıin oblys gýternatory Borıs Dýbrovskıı qala men qala qonaqtaryna arnaý sózin aıtty. «Chelıabi oblysyn kóptegen etnostar qutty meken etedi. Bul bizdiń ereksheligimiz, artyqshylyǵymyz. Dostyq arqasynda ortaq otanymyzdy damytýdamyz» dedi gýbernator Borıs Dýbrovskıı.
Reseı kúni Glınka atyndaǵy opera jáne balet teatry aldyndaǵy alańda bolashaq «Sad ShOS – BRIKS» saıa baǵynyń negizi salynyp, belgi qoıyldy. Onda on túp Esmeralda úıeńkisin Reseı, О́zbekstan, Tájikstan, Qytaı halyq respýblıkasy, Brazılııa, Qyrǵyzstan, Qazaqstan, Pákistan, Úndistan, Ońtústik Afrıka respýblıkasy elderiniń Reseıdegi dıplomatııalyq ókilderi otyrǵyzdy. Olar aǵash otyrǵyzyp jatqanda sol memlekettiń týy jelbirep turdy. Olardyń qatarynda úıeńkini Qazaqstan Respýblıkasy atynan konsýldyń tapsyrmasy boıynsha Chelıabi oblysy qazaqtarynyń «Azamat» etno mádenı qoǵamdyq birlestiginiń tóraǵasy Qanat Seıtikov otyrǵyzdy.
« Ońtústik Ýraldy jaılaǵan qandastarymyz úshin bul úlken dáreje boldy. Ata mekenimiz Qazaqstannyń kók Týy álemdegi ózge eldermen qatar jelbirep turýy bizdiń rýhymyzdy kóterdi. Al myna jerde ornaıtyn bolashaq saıabaqta, biz otyrǵyzǵan úıeńki janyna talaı otandastarymyz, osyndaǵy qandastarymyz kelip otyratyn, demalatyn jáne kórshi elmen dostyǵymyzdy pash etetin bolady» dedi Qanat Seıtikov.
Eske sala ketsek, Reseıdiń Chelıabi oblysynda 36 myń qandastarymyz turady. «Azamat» etno mádenı qoǵamdyq birlestigi olardyń salt-dástúrin, tilin umytpaýy úshin kóptegen sharalar atqaryp keledi.
Názıra Járimbetova
«Egemen Qazaqstan»
Chelıabi, RF