Ázirge óndirilgeni 9 mln teńge ǵana, qalǵan qarajatqa qatysty sot prosesteri júrip jatyr. Oblystyq ekologııa departamentiniń basshysy Qabıjan Qapanov óńirlik kommýnıkasııalar qyzmetinde ótken brıfıngte osyndaı málimetterdi keltirdi. Bıylǵy bes aıda departament tarapynan 47 tekserý júrgizilgen. Nátıjesinde 128 ekologııalyq zań talaptaryn buzý faktileri anyqtalypty.
-О́tken jyly oblystaǵy tabıǵat paıdalanýshylar sharýashylyǵyna 382 tekserý júrgizildi. 278 buzýshylyq anyqtalyp, 48 mln teńgeni quraıtyn 248 ákimshilik aıyppul salyndy. Qorshaǵan ortaǵa keltirgen zalalyn óteý úshin 135 nusqama berildi, - deıdi oblystyń bas ekology.
Memlekettik ekologııalyq baqylaý júrgizý nátıjesinde qorshaǵan ortaǵa emıssııalarǵa ruqsat qujatynsyz qyzmetin júrgizgen «Sabırov B.», «Ermekov J.» jeke kásipkerlikteri men «Jylyoı sý» MKK-niń sharýashylyq qyzmeti sot sheshimderi negizinde toqtatylǵan.
Munaıly aımaqtyń ekologııalyq ahýaly syn kótermeıtini jaıly buǵan deıin de aıtylyp júr. Ásirese oblys ortalyǵynyń turǵyndary aýadaǵy jaǵymsyz ıiske jıi shaǵymdanady. Departament basshysynyń aıtýynsha, mekeme qyzmetkerleri aýa quramyn qolda bar jabdyqtarmen baqylap otyrady. Alaıda, aýa lastanǵanyn anyqtaıtyn tehnologııa joq. Jabdyqtar sońǵy tórt jylda jańartylmaǵan. Qarjy mınıstrligi bul maqsatqa qarajat bólmeı keledi. Endi ǵana oblys ákimdigi qarjy qarastyryp, tender jarııalady. Sol arqyly ekologııa departamenti jyljymaly zerthana ashýdy josparlap otyr. О́tken jyldyń ózinde ǵana kúkirtti sýtegi atmosferaǵa 81 ret ruqsat etilgen mólsherden artyq shyǵarylǵan. О́ndiristi ólkedegi el ekonomıkasyna eleýli úles qosyp júrgen iri kásiporyndardyń ekologııa máselesine salǵyrt qaraıtyny ókinishti.
Baqytgúl BABASh,
«Egemen Qazaqstan»
ATYRAÝ