Mańǵystaý oblysynyń Túpqaraǵan aýdanyndaǵy Aqshuqyr aýylyndaǵy mektep-lıseıdiń 45 túlegi oraza aıynda qaıyrymdy is jasady. Olar mektep bitirý keshinen bas tartyp, ózderi jınaǵan 400 myń teńge qarajatty aýyr naýqasqa shaldyqqan 11 jasar Ámına Táýirbaevaǵa emdelýi úshin tapsyrdy.
2015 jyly boıynda qaýipti dert bar ekendigi anyqtalǵan Ámına ýaqyt ótkizbeı emdelgenmen, sońǵy kezderi kórý qabileti kúrt nasharlap ketken. Úıinen bilim alatyn qyzdy týystary men ata-analary qyrkúıekke deıin Reseıge aparyp, dárigerlerge qaratyp kelýge bel býyp otyr.
Ámınanyń ájesi Márııash qaıyrymdy jastarǵa rızashylyǵyn bildirip, úlken ómirge basqan qadamdaryna sáttilik tilese, túlekter ramazan aıynda mektepti saýapty ispen aıaqtaǵysy keletindikterin, mektep bitirý keshi bolmaǵanmen, dostarymen birge áli talaı keshterdiń ótetindigine senimdilik bildirdi.
Gúlaıym ShYNTEMIRQYZY, «Egemen Qazaqstan»