«Nur Otan» partııasy arqyly turǵyndarǵa MÁMS júıesin engizý boıynsha túsindirý jumystaryn ótkizý, halyqtyń quqyqtyq, aqparattyq saýattylyǵyn arttyrý, sondaı-aq áleýmettik qarama-qaıshylyqtardy sheshý, onyń aldyn alý maqsatynda uıymdastyrylǵan sharada Májilis depýtaty Záýresh Amanjolova, Densaýlyq saqtaý vıse-mınıstri Lázzat Aqtaeva, Eńbek jáne halyqty áleýmettik qorǵaý mınıstrliginiń, «Atameken» ulttyq kásipkerler palatasynyń ókilderi bas qosty. Alqaly májilis beınekonferensııa pishininde ótti. Oǵan elimizdiń 16 óńirin esepke alǵanda 200-den astam qatysty.
Kezdesý barysynda áleýmettik medısınalyq saqtandyrý qory jarnasyn tóleýden azamattardyń 15 sanaty, ıaǵnı halyqtyń áleýmettik az qamtylǵan toby bosatylatyny aıtyldy. Olardyń qataryna balalar, buryn «Batyr Ana» ataǵyn alǵandar, «Altyn alqa», «Kúmis alqa» ıegerleri, sondaı-aq I jáne II dárejeli «Analyq dańq» ordenimen marapattalǵan kóp balaly analar, Uly Otan soǵysy ardagerleri men múgedekteri, múgedekter jáne basqa da sanattaǵy jandar kiredi.
– Jospar boıynsha bul baǵdarlamamen eń birinshi medısına salasynyń qyzmetkerlerin, ekinshiden, jumys berýshi tulǵalardyń negizgi mindetterin jan-jaqty túsindirýden bastadyq. Árbir adam HQO-ǵa baryp, qaı statýsqa jatatyn bilgeni jón. Áleýmettik jaǵdaıy boıynsha, jumyssyz bolsa, tirkelip, arnaıy qujat alý tıis, – dedi Májilis depýtaty Záýresh Amanjolova.
Búgingi kúni árbir qazaqstandyq 2018 jyldyń 1 qańtaryna deıin áleýmettik medısınalyq saqtaý júıesindegi óz statýsyn belgilep alýy kerek. Sol kezde qıyndyqqa tap bolǵan jaǵdaıda kimniń kómegine birinshi júgine alatyndyǵy belgili bolady.
– Osy jyldyń 1 shildesinen bastap medısınalyq saqtandyrý júıesi iske qosylatyny, onyń qyr-syry jaıly buqara halyqtyń basym bóligi habarsyz ekeni belgili boldy. Osyǵan baılanysty «Nur Otan» partııasy bolyp halyqqa túsindirý boıynsha 45 myńnan astam jıyn ótkizdik. Oǵan úsh mıllıonnan astam halyq qatysty. Sonymen qatar, arnaıy kitapshalar da shyǵardyq, – dedi Respýblıkalyq qoǵamdyq qabyldaý bólmesiniń meńgerýshisi Jumajan Júkenov.
Halyqqa túsindirme jumystaryn ótkizý boıynsha partııa fılıaldary, densaýlyq saqtaý basqarmalary birlesken semınarlar ótkizgen.
Kezdesý sońynda turǵyndar kókeılerinde júrgen suraqtaryn qoıyp, mamandar tarapynan tushymdy jaýaptaryn aldy.
Aıan ÁBDÝÁLI, «Egemen Qazaqstan»