Mine, kópten kútken kún de kelip jetti. «Bala daýysy–2017» ulttyq balalar án baıqaýyna qatysýǵa tilek bildirgen 120-ǵa jýyq úmitker oblystyq mádenıet ortalyǵyna jınalyp, sahnaǵa shyǵý kezekterin taǵatsyzdana tosyp turdy. Biz kópshilik arasynan óńirge tanymal «Aınalaıyn» bı tobynyń jetekshisi Botagóz Mámetovany jolyqtyryp, ol úkilep báıgege qosqan balaqaılardyń qandaı daıyndyqpen kelgenin suradyq. – Men bir jaǵynan Petropavl qazaq klassıkalyq gımnazııasyndaǵy mýzykalyq stýdııada jumys isteımin. Munda talantty oqýshylar az emes. Onshaqtysyn baptap ákeldim. Olardyń arasynda Aıaýlym Káribaı bolashaǵynan úlken úmit kúttiredi. Qazaq, orys, aǵylshyn tilderinde án shyrqaıdy. Baıqaýdy uıymdastyrýshy Tolǵanaı Hasenqyzynyń aıtýynsha, baıqaý balalar án shyǵarmashylyǵyn damytýdy kózdeıdi. Mýzykalyq bilim alýlaryna kómektesedi. Mýzykalyq prodıýser Aıjan Kerimqulova men ánshi, jul-dyzdy tálimger Lýına irikteý kezeńine tórelik etip, «Bala daýysy» jobasynyń óńirlik jeńimpazyn anyqtaıtyn bolady. Saıys erejesi boıynsha rettik nómir úlestirilip, birinshi kirý kezegi Aınur Tileýlınaǵa buıyrdy. «Sálem, Astana» oblystyq baıqaýynyń Gran-prı ıegeri «Qısmet» ánin tańdapty. Ony tamyljyta shyrqap júrgen Gaýhar Qaspaqova apasyna barynsha uqsaýǵa tyrysty. Nuraıym Esqoja mundaı bedeldi dodaǵa alǵash ret qatysqanyna qaramastan ózin erkin, baısaldy ustady. Jan dúnıesimen oryndaǵan ánderi júrekterge jetip jatty. Uzyn-sonar kezek kútken qatysýshylardyń án saıysy kópke deıin sozylyp, árkim vokaldyq, ártistik qarym-qabiletterin tanytýǵa barynsha umtyldy. Qazylardyń sheshimimen Taıynsha qalasyndaǵy №5 qazaq mektebiniń oqýshysy Ásel Tasmaqanova jeńimpaz dep tanylyp, respýblıkalyq kezeńge joldama aldy.
О́mir ESQALI, «Egemen Qazaqstan»
Soltústik Qazaqstan oblysy