«Qazaqstan» RTRK» AQ («Kazsport» pen «Qazaqstan») birden fýtboldan eki álem chempıonatyn (2018 jáne 2022 jyldar) translıasııalaýǵa quqyq ala otyryp, 6 jylǵa kelisim jasady.
Aıta ketý kerek, bul máselede TV quqyǵyn alyp satýshy deldaldardy aınalyp ótip, kelisimdi quqyqqa ıe bolýshynyń ózimen jasaýǵa qol jetip otyr. Osynyń arqasynda qomaqty qarjy únemdelýde.
"Osy eki chempıonattan basqa Qazaqstanda álemdik klýbtyq birinshilikterdi, fýtzal men jaǵajaı fýtboly boıynsha álem chempıonattaryn, áıelder, túrli jastaǵy jastar men jasóspirimder quramalary arasyndaǵy álem birinshilikterin, sondaı-aq erteń, 17-shi maýsymda bastalatyn Konfederasııa-2017 Kýbogyn kórsetý quqyǵy satyp alyndy. Bul básekelerdi «Kazsport» pen «Qazaqstan» telearnalarynan tikeleı efırde tamashalańyzdar", - dep jazdy mınıstr Feısbýktegi paraqshasynda.