Kezdesý barysynda saýda-ekonomıkalyq yntymaqtastyqty damytýdyń aldaǵy perspektıvalary, sondaı-aq Qazaqstan-Ýkraına ekonomıkalyq yntymaqtastyǵy jónindegi Memleketaralyq komıssııanyń ótken otyrysynyń qorytyndylary talqylandy.
Aıta keteıik, 2017 jyldyń 14-16 maýsymynda Astanada QR Premer-Mınıstriniń birinshi orynbasary A. Mamın men Ýkraına Premer-Mınıstriniń orynbasary - óńirlik damý, qurylys jáne turǵyn úı-kommýnaldyq sharýashylyǵy mınıstri G. Zýbkonyń tóraǵalyǵymen ekonomıkalyq yntymaqtastyq jónindegi Birlesken Memleketaralyq Qazaqstan-Ýkraına komıssııasynyń XIII otyrysy ótti.
Qazaqstan men Ýkraınanyń úkimettik delegasııalary eki eldiń ekonomıka, energetıka, kólik jáne logıstıka, AО́K, týrızm, azamattyq avıasııa salalaryndaǵy ekijaqty saýda-ekonomıkalyq jáne ınvestısııalyq seriktestikti odan ári damytý máselelerin talqylady.
Aǵymdaǵy jyldyń alǵashqy 4 aıynda elder arasyndaǵy ózara saýda kólemi 2016 jyldyń uqsas kezeńimen salystyrǵanda 37,3%-ǵa ósti jáne 486,3 mln dollardy qurady. Osyǵan baılanysty, QR Premer-Mınıstriniń birinshi orynbasary A. Mamın ekonomıkalyq yntymaqtastyqty jandandyrý qajettigin basa aıtty. Aıtar bolsaq, búginde Qazaqstanda Ýkraınanyń qatysýymen 661 kásiporyn jumys isteıdi.
«Saýda-ekonomıkalyq yntymaqtastyqty odan ári damytý úshin eksporttyq-ımporttyq operasııalardy ulǵaıtyp, jetkiziletin taýarlar men qyzmetterdiń nomenklatýrasyn keńeıtý kerek, sondaı-aq Qazaqstan men Ýkraınanyń kásipkerleri arasynda tikeleı baılanysty ornatý qajet», - dedi QR Premer-Mınıstriniń birinshi orynbasary.
Qazaqstan men Ýkraına arasyndaǵy júk aǵynynyń artýy tranzıt pen logıstıka salasyndaǵy yntymaqtastyqtyń tıimdiligin aıǵaqtaıdy. 2017 jylǵy qańtar-aqpan aılarynda Qazaqstan men Ýkraına arasyndaǵy eksporttyq jáne ımporttyq júk kólemi 186,6 myń tonnany qurady, bul 2016 jylǵy deńgeımen salystyrǵanda 15%-ǵa joǵary. Transkaspıı halyqaralyq kólik baǵdary dálizin damytý jumysy jalǵastyrylyp jatyr.
Ekonomıkalyq yntymaqtastyq jónindegi memleketaralyq komıssııa jumysynyń qorytyndysy boıynsha A. Mamın men G. Zýbko tıisti hattamaǵa qol qoıdy.