Memleket basshysy H Astana ekonomıkalyq forýmy Eýrazııa keńistigi úshin tarıhı betburysty kezeńde ótkizilip otyrǵanyn aıtty, dep habarlaıdy Aqorda.
– Shanhaı yntymaqtastyq uıymyna Úndistan men Pákistan kirgen soń 3 mıllıard adamdy qamtıtyn naryǵy bar jańa jahandyq oıynshy paıda boldy. Shanhaı yntymaqtastyq uıymy elderin Uly Jibek jolyn jańǵyrtý baǵdarlamasymen qamtý jańa ekonomıkalyq sýbóńirdi qalyptastyrady. Birikken Ulttar Uıymynyń Bas hatshysy Antonıý Gýterrısh Shanhaı yntymaqtastyq uıymy «búgingi álemdik qurylymnyń mańyzdy tiregi» sanalatynyn, al beıbitshilikti saqtaýdyń eń myqty quraly – ınklıýzıvtik damý ekenin atap ótti. Búgingi forým osy ınklıýzıvtik jáne ornyqty damý máselesine arnalǵan, – dedi Qazaqstan Prezıdenti.
Nursultan Nazarbaev qazirgi zamannyń teńdessiz jyldamdyqpen ózgerip, ekonomıkalyq ósý men ómir saltymyzdyń tabıǵatyn túbegeıli qaıta túrlendiretin tyń jańalyqtar men ǵylymı-tehnıkalyq sheshimder dáýiriniń kele jatqanyna nazar aýdardy.
Sonymen qatar, Memleket basshysy jahandyq ekonomıkalyq saıasat qorshaǵan ortanyń lastanýynyń shekti deńgeıge jetýi jáne jahandyq energııa tutynýdaǵy teńsizdiktiń artýy sııaqty búgingi syn-tegeýrinderge tolyq jaýap bere almaıtynyn aıtty.
Qazaqstan Prezıdenti ekonomıkalyq ósimniń qordalanyp qalǵan syn-tegeýrinderdi kóbeıtpeı, qaıta olardy sheshýge septigin tıgizýi mańyzdy ekenin atap ótti.
– Álemdik qoǵamdastyqqa jańa ekonomıkalyq modelge kezeń-kezeńmen kóshý qajet. Ol taza energetıkaǵa, kúsh-jigerdi jumyldyrýǵa jáne búkil álemniń múddesin eskeretin ujymdyq jaýapkershilikke negizdelýge tıis, – dedi Memleket basshysy.
Nursultan Nazarbaev álemdik ekonomıkany damytýdyń mańyzdy aspektilerine qatysty óz oılaryn da ortaǵa saldy.
Qazaqstan Prezıdenti elderdiń baılyǵy men olardyń turǵyndarynyń ál-aýqatyn tanytatyn kórsetkishterdi esepteýdiń jańa ádisterin ázirleý, sondaı-aq álemdik qarjy qurylymyn transformasııalaý qajettigin atap ótti.
Budan bólek, Memleket basshysy ekonomıkalyq ósim taza energetıkany damytýǵa jáne ekologııany saqtaýǵa negizdelýge tıis ekenine nazar aýdaryp, Parıj kelisimin jalpyǵa birdeı oryndaýdyń mańyzdylyǵyna toqtaldy.
Sondaı-aq, Nursultan Nazarbaev Qazaqstannyń úshinshi jańǵyrýy aıasynda elimizde aýqymdy jumys bastalǵany jáne energetıka salasyn jańǵyrtýǵa baılanysty atqarylyp jatqan sharalar jóninde aıtty.
– 10 jyl buryn biz TMD elderi arasynan birinshi bolyp Ekologııalyq kodeksti qabyldadyq. 2012 jyly «Energııa únemdeý jáne energııa tıimdiligin arttyrý týraly» zań kúshine endi. Sol jyly elimiz Halyqaralyq «EKSPO-2017» mamandandyrylǵan kórmesin ótkizý quqyǵyn jeńip aldy. Qazir biz sonyń aýmaǵynda turmyz. Kórmeniń taqyryby – «Bolashaqtyń energııasy», – dedi Qazaqstan Prezıdenti.
Sońynda Nursultan Nazarbaev bolashaqta jer sharynyń ekologııalyq turǵydan taza bolýy úshin ıadrolyq qarýsyz álem tujyrymdamasynyń mańyzdy ekenin atap ótti.
– Qazaqstan ıadrolyq qarýsyz álem qurý jolyndaǵy kúreste kóshbasshy bolyp sanalady. Biz – ıadrolyq synaq polıgonyn joıǵan jáne qýatty ıadrolyq zymyran arsenalynan erikti túrde bas tartqan eń alǵashqy ári birden-bir elmiz. Biz bul jumysty jalǵastyramyz jáne barshańyzdy osy kúreste bizdi qoldaýǵa shaqyramyz. Sol arqyly biz jahandyq yntymaqtastyq pen beıbitshilik isine adal ekenimizdi taǵy bir márte dáleldeı alamyz, – dedi Memleket basshysy.