Aıtalyq 2014-2015 jyldary óńirdegi kolledjderdi memlekettik tapsyrys boıynsha 6981 oqýshy-stýdent aıaqtap, kásiptik bilim alyp shyǵypty. Olardyń tek 3909-y ǵana kásiptik tehnıkalyq oqý ornynda alǵan mamandyqtaryna sáıkes qyzmetke ornalasqan. 2238-i kolledjderde alǵan bilimderin paıdaǵa asyra almaı, óz erikterimen basqa mamandyqtar boıynsha qyzmetke kirgen. Sondaı-aq osy aalyqta 834 túlek múldem jumysqa tura almaı, ári «saıda sandaryn, qumda izderin» bildirmeı, jym-jylas joǵalǵan. Bunyń ózi maqsatty túrde memleket qarjysyna oqytylǵan mamandardyń 40-45 paıyzy óz erikterimen jumys izdeýge májbúr bolǵanyn kórsetedi. Tipti aımaqtaǵy keıbir kolledjderde alǵan mamandyqtary boıynsha jumysqa ornalasa almaǵan túlekterdiń sany 64 paıyzǵa deıin jetkeni kóńilge tipten qonymsyz atap aıtqanda osyndaı jaǵdaı Embi qyzmet kórsetý salasy kolledjinde oryn alypty. Aqtóbe oblysy boıynsha tekserý komıssııasy júrgizgen memlekettik aýdıt tekserýleri nátıjesinde oblys ortalyǵyndaǵy óndiristik kásiporyndar men jaýapkershiligi shekteýli seriktestikterden 2014-2015 jyldary kolledj túlekterine júzdegen suranystar túskenin aıǵaqtaıdy. Alaıda bul suranystar tek sol aıtylǵan, joldanǵan kúıinde qalyp qoıypty. О́ıtkeni bıýdjet qarajatyna kásibı mamandyq alyp shyqqan túlekterdiń birde-biri atalǵan mekeme, kásiporyndarǵa jumysqa qabyldanbapty.
-Biz budan Aqtóbe qalasynda ornalasqan mekeme kásiporyn basshylarynyń usynystary tek kolledjde oqıtyn oqýshylar sanyn jasandy túrde kóbeıtý maqsatynda ǵana jasalǵanyna kóz jetkize alamyz. Sonyń saldarynan 112,6 mıllıon tenge bıýdjet qarajaty tıimsiz túrde jumsalǵan dedi bul turǵyda «Egemen.kz» tilshisine Aqtóbe oblysy boıynsha tekserý komıssııasynyń tóraǵasy Saǵat Eńsegenuly.
Temir Qusaıyn