Tereń bilim eldi eńseli bolashaqqa bastaıdy

Keshe Aqordada Memleket basshysy Nursultan Nazarbaev Qazaqstannyń eń úzdik magıstranttaryna Nazarbaev stıpen­dııa­sy men tósbelgi tapsyrdy. Nazarbaev stıpendııasy – elimizdegi ǵa­lymdar men pedagogtardyń eńbegine tyń serpin berý maqsa­tyn­­da elimizdiń jas magıstranttaryna alǵash ta­ǵaıyn­dalǵan. Prezıdent syılyǵyna Dılıara Kopytına, Dıana Bórlibaeva, Nar­­kes Orazbaeva, Jadyra Aqy­lova, Aleksandr Logvınenko, Nar­taı Bekmoldınov, Alfııa Igesınova, Dınara Asqarqyzy, Baýyr­jan Ábdiqadyrov, Olga Krıajevskıh syndy elimizdiń joǵary oqý oryndarynyń magıstranttary laıyq dep tanyldy. – Biz ózderińizben táýelsizdi­gi­miz­diń 20 jyldyǵy qarsańynda kez­desip otyrmyz. Osy jyl­dar­dyń ishinde atqarylǵan sharýa­lar­dyń barlyǵyn bilesizder dep oılaımyn. Bul jyldar elimiz úshin ońaı jyldar bolǵan joq. Biraq ta táýelsizdigimizdiń arqa­syn­da buryn-sońdy bolmaǵan jaǵ­daıda ómir súrip jatyrmyz. Qazaq halqy óziniń kóp ǵasyrlyq tarıhynda mundaı táýelsizdik, mun­daı aýqymdaǵy shekarada dú­nıe júzine belgili memleket qurǵan emes. Tarıhı 20 jyldyq eldiń esinen esh ýaqytta umy­tyl­maı­dy. Qazaqstan Keńes ókimeti qulaǵannan keıingi kezdesken bar­lyq qıyndyqty úlken kúsh-ji­ger­men eńserdi. Búginde Oń­tús­tik-Shyǵys Azııadaǵy daǵdarys, 2008-2010 jyldardaǵy asa aýyr qar­jy­lyq-ekonomıkalyq daǵda­rys áli de jalǵasýda. Eýropa bul qıyn­dyqtyń áserimen áli de kú­resý ús­tinde, – dedi Nursultan Ábishuly. Elbasy kelesi kezekte qazirgi zaman – bilim men ǵylymnyń za­many ekenin atap kórsetti. Ja­handaný jaǵdaıynda memlekettiń ozýy úshin, adamnyń ozýy úshin, básekege saı bolýy úshin eń birinshi másele – bilim men ǵy­lym­nyń órkendeýi. Osyǵan baıla­nys­ty eldiń de, memlekettiń de orny aıqyndalady. Sondyqtan, Qazaq­stan el retinde, memleket retinde bilimge qatysty, ásirese, mektep jasyndaǵy, mektepke deıingi máselelerdi sheship jat­qa­nyn bilesizder. Jańadan memlekettik, memlekettik emes ýnıversıtetter ashylyp jatyr. Qaı jerde oqımyn deseń de barlyq jaǵdaı bar. Sondyqtan, bizdiń jastarymyz ǵylym men bilimge umtylyp, eldiń keleshegin oılaı­tyn bolsa, táýelsizdigimizdiń bo­la­shaǵy da myqty bolady. Biz maqsattarymyzǵa jetetin bola­myz, dedi Nursultan Nazarbaev. Memleket basshysy búginde kúlli álem ındýstrııalyq kezeń­nen keıingi damý jolyna tús­ke­nin atap ótti. О́mirdiń múlde jańa tártibi ornyǵýda. Jer qoı­naý­yndaǵy baılyqqa qarap oty­ryp qalmaı, jańa ǵylymı-teh­nı­kalyq progreske negizdelgen jańa ekonomıka qajet ekenine de nazar aýdardy. – Memleket qoldan kelgenniń bárin jasap jatyr. Qazaqstan­nyń údemeli ındýstrııalyq-ın­no­vasııalyq damý baǵdarlamasy naqty osyǵan baǵyttalǵan. Biz 550 zaýyt turǵyzamyz, 20 myń ju­mys ornyn ashamyz, tipti taıaý jyldar ishinde biz odan ári da­mı­tyn bolamyz. Jer qoınaýyndaǵy baılyqtar, munaı men gaz, metall bir kezde taýsylady, qaıtyp qalpyna kelmeıdi, al endi ekinshi ekonomıkany qurý qajet, – dep atap ótti Nursultan Nazarbaev. Elbasy sondaı-aq ındýstrııalan­dy­rý, ınnovasııany endirý mem­le­kettiń táýelsizdigin nyǵaıtý­men birdeı ekenin atap kórsetti. Sondyqtan ǵylymnyń tıimdiligi jáne barlyq ekonomıkany ın­no­vasııalyq jolǵa qoıý eń basty másele sanalady. – Qazaqstan aldynda óte kúr­deli mindetter tur. Osynyń al­dyn­daǵy jáne osy ǵasyrdaǵy 50 jyl ekonomıkalyq-ındýstrııa­lyq renessans boldy. Álemniń bir­qatar elderi barlyq salada jańa serpilis jasady, al tek jańa tehnologııa men ǵylymı jetistikterdi paıdalanǵan elder ǵana jahandaný kóshbasshylary boldy. Biz mundaı problemaǵa endi ǵana naqty qadam bastyq. In­dýstrııalyq-ınnovasııalyq da­mýdyń basty maqsaty – bizdiń táýelsizdigimizdi, memlekettigimizdi nyǵaıtý. Bul – táýel­siz­diktiń ekinshi jaǵy. Másele mem­lekettiń keleshekte báskelestikke qabiletti el bolyp, adamdardyń ómirin jaqsartatyn elge aınalýy nemese bul isti atqara almaı­ty­ny týraly bolyp otyr. Mine, ın­dýstrııalandyrý men ınnova­sııa­nyń kilti osynda. Sondyqtan da men 100 ınnovasııany usyndym, – dedi Prezıdent. Memleket basshysy Qazaqstan úshin eń basty ınnovasııalyq ba­ǵyt­tar azyq-túlikpen qamtama­syz etý, energetıka salasy, bıologııa, medısına men qarjy-ekonomıkalyq salalar bolyp tabylatynyn atap ótti. – Ǵalymdar men pedagogtardy daıarlaýǵa taǵy da bir serpin berý úshin men Ulttyq Ǵylym akade­mııa­synyń múshesi, akademık retindegi ózimniń stıpendııamdy eli­mizdiń eń úzdik magıs­trant­taryna berip otyrmyn. Bul zertteýler men ómir súrý deńgeıin kóterýge qarjylaı kómek qana emes, sonymen birge, bul mem­le­kettiń erekshe qamqorlyǵy, bizdiń áleýetimizdi moıyndaýshylyq. Sen­der óz ómirlerińde mundaı je­tistikke birinshi ret jetip otyr­syńdar. Konkýrstyq komıssııa 7000 úmitkerdiń arasynan senderdi tańdap aldy. Árqaısy­laryń ózderińdi talantty magıstr retinde kórsetip, ózderiń­niń naqty jetistikterińdi dálel­dep shyqtyńdar. Sondyqtan osyn­daı quqyqqa ıe bolyp otyrsyńdar. Aldaryńa bıik maqsattar qoıýdy jalǵastyryp ári oǵan qol jet­kizińder. Biz senderge, bizdiń eli­mizdiń barlyq talantty jasta­ry­na maqsatty túrde kómektesetin bolamyz, – dedi Memleket bas­shysy. Qazaqstan Respýblıkasy Pre­zıdentiniń stıpendııasy barlyq oqý kezeńinde úzdik oqýymen kó­ringen, ǵylymı-zertteý jumys­ta­rymen shuǵyldanatyn jáne oqý oryndaryndaǵy qoǵamdyq ómirge belsene aralasatyn joǵary oqý oryndarynyń magıstranttaryna taǵaıyndalady. Ulttyq joǵary oqý oryndaryna stıpendııa ta­ǵaıyndaý erejesine sáıkes ǵylymı keńesterdiń sheshimi negizinde 2011-2012 jyldardaǵy oqý jylyna arnalǵan stıpendııany taǵaıyndaý úshin konkýrsqa 19 úmitker usynyldy. Bilim jáne ǵylym mınıstrliginiń respýblı­ka­lyq konkýrstyq komıssııasy ǵylymı zertteýlerdegi joǵary je­tistikteri, jetekshi jýrnal­dar­daǵy ǵylymı jarııalanymdary, úzdik oqýy men belsendi qoǵam­dyq qyzmetteri úshin ulttyq jo­ǵary oqý oryndarynyń 10 úzdik magıstrantyn tańdap aldy. Bul kúngi kezdesý kezinde Nazarbaev stıpendııasyn ıelengen magıstranttar da sóz alyp, óz oı-paıymdarymen bólisti. Olar el­diń ǵylym-bilim salasy tóńire­gin­de ózderin tolǵandyryp, óz­de­ri túbegeıli zerttep júrgen máse­le­lerdi ortaǵa saldy. El jas­ta­ryna kórsetken sheksiz qam­qor­ly­ǵy úshin Elbasyna alǵystaryn jetkizdi. Máselen, «Jemis-kókónis sha­rýa­shylyǵy» mamandyǵynyń ma­gıs­tranty Dınara Asqarqyzy: «Búgingi kún – meniń ómirimdegi eń bir umytylmas, baqytty kún. Elimizde alǵash ret taǵaıyn­dal­ǵan «Nazarbaev stıpendııasy­nyń» ıegeri ataný men úshin zor maqtanysh. Búginde bilimge qumar jastardyń elimizde, sondaı-aq shetelderde bilim alýyna barlyq jaǵdaı jasalǵan. Men Prezıdent stıpendııasyn ıelene oty­ryp, Sizdiń aldyńyzda bizdiń Ota­ny­myzdyń bilim jáne ǵylym sala­syn­daǵy mindettemeleriniń oryn­dalýyna bar kúsh-jigerimmen at­sa­lysamyn», dedi. «Menedjment» mamandyǵy boı­ynsha bilimin tereńdetip júr­gen Jadyra Aqylova Qazaq­stan­da tuńǵysh ret taǵaıyndalǵan stı­­pendııany tapsyrǵany úshin Memleket basshysyna alǵys aıt­ty. «Meniń armanym – ǵylymmen aınalysyp, kásiporynda qyzmet etip, jıǵan tájirıbemdi stýdenttermen bólisý. Sizdiń stýdent jas­tarǵa kórsetip otyrǵan qam­qorlyǵyńyzǵa barlyq stýdentter atynan sheksiz alǵys bildiremin. Sizge zor densaýlyq, uzaq ǵumyr, elimizdi keleshekke bastaǵan saparyńyzǵa sáttilik tileımin», dedi J.Aqylova. Qurmanǵazy atyndaǵy Qazaq ulttyq konservatorııasynyń ma­gı­stranty Nartaı Bekmoldınov ta óziniń Prezıdent stıpendııa­sy­nyń ıegeri bolǵanyna qýa­nysh­ty ekenin jetkizdi. «Bul kún – men úshin umytylmas kúnderdiń biri. Sizdiń ónerge jaqyn eke­nińizdi bile otyryp, júregimdegi bar qýanyshty sózben emes, áýen­men jetkizýge ruqsat etińiz», dep baıan aspabynda Qurmanǵazynyń «Balbyraýyn» kúıi men «Atameken» ánin naqyshyna keltire oryn­dap berdi. Kezdesý qorytyndysynda El­basy Nursultan Nazarbaev jas ǵalymdarǵa aıtylǵan oılary úshin alǵys bildirip, esh ýaqytta izdenisten, jańalyq ashýǵa degen qulshynystan tanbańdar degen tilegin jetkizdi. Prezıdent jas ǵalymdarmen estelik sýretke tústi. Láıla EDILQYZY. ----------------------------------------- Sýretti túsirgender S.BONDARENKO, B.OTARBAEV.