...MEKTEP PEN BALABAQShA ESIK AShTY
Jańaarqa aýdanyndaǵy Eskene aýylynyń ajaryn eki qabatty 320 oryndyq mektep ǵımaraty asha tústi. Muǵalimder kúni aldynda ashylǵan oǵan oqýshylar qýana aýysty. Ishi-syrty syńǵyrlaǵan bilim uıasyna oblys ákimi Serik Ahmetov bıologııa kabınetine arnalǵan qondyrǵylardy, qural-jabdyqtardy tartý etti.
Qaraǵandydaǵy «Keńdala» shaǵyn aýdanynda boı kótergen «Altyn saqa» balalar baqshasyn búldirshinderdiń toltyrýy atalǵan merekemen tuspa-tus keldi. Onda osy aımaqta turatyn muǵalimder men dárigerlerdiń jetkinshikteri tárbıelenedi.
Osylaısha mektep aýylda esik ashsa, balabaqsha qalada boı kótedi.
Aıqyn NESIPBAI.
Qaraǵandy oblysy.
* * *
...EMHANA QÝANYShY
Baıanaýyldyń Qarajar, Jalǵyz qaıyń aýyldary Aqsań aýyldyq aýmaǵyna qaraıdy. Eki aýyldyń birinshisinde –262, ekinshisinde 350-deı adam turady. Mektebi, klýby bar. Qarajar aýylyna «Mıras» JShS dárigerlik bólimshe úıin salyp berdi.
Aýyl ákimi Tólegen Smaǵuldyń aıtýynsha, dárigerlik bólimshege seriktestik 10 mıllıon teńgedeı qarajat jumsaǵan kórinedi. Buryn medısınalyq mekemege saı emes úı paıdalanylyp kelipti. Al bul kúnderi jarqyraǵan jańa ǵımarat, jańa medısınalyq qural-jabdyqtar alynǵan. Úsh aýylǵa bir jedel járdem kóligi bekitilgen.
Jyldar boıy ýáde etilgen dárigerlik bólimshe ashylyp, taý baýraıynda otyrǵan aýyldar qýanyp qaldy.
Farıda BYQAI.
Pavlodar oblysy.
* * *
...ORYNBASARLAR TAǴAIYNDALDY
Qyzylorda oblysy ákiminiń ıdeologııa jónindegi orynbasary Murat Muhamedovtiń Senat depýtaty bolyp saılanǵany belgili. Jaqynda oblys basshysy Bolatbek Qýandyqov jańa orynbasardy qutty ornyna otyrǵyzdy.
Rzaqul Nurtaev 2010 jyldan beri qaraı oblys ákiminiń aýylsharýashylyq máseleleri jónindegi orynbasary qyzmetin atqaryp keledi. Endi ol aldaǵy ýaqytta aımaq ıdeologııasyna jaýap bermek. Al aýylsharýashylyq salasyna Baqyt Jahanov jaýapty bolmaq. Baqyt Dúısenuly orynbasar bolyp taǵaıyndalǵanǵa deıin Tabıǵı resýrstar jáne tabıǵatty paıdalanýdy retteý basqarmasynyń bastyǵy qyzmetin atqardy.
Erjan BAITILES.
Qyzylorda.