– Astanada ótip jatqan EKSPO-2017 kórmesi eki el arasyndaǵy qarym-qatynasty jańa bir deńgeıge kóteredi dep senemin. Jahandyq kórme barysynda, ıaǵnı 20 maýsymda Fınlıandııanyń ulttyq kúni atap ótiledi. Oǵan arnaıy kelgen fın eliniń prezıdenti Saýlı Nıınıste qatysady. Delegasııanyń quramynda 70-ke jýyq bıznes ókilderi bolady. Árıne, joǵary deńgeıdegi kezdesýler bolatyny anyq. Fınlıandııa EKSPO-ǵa úlken daıyndyqpen kelip otyr, – dedi Qazaqstannyń Fınlıandııadaǵy Tótenshe jáne ókiletti elshisi Murat Nurtileýov.
Elshiniń aıtýynsha, EKSPO-2017 kórmesi aıaqtalǵannan keıin Astana-Helsınkı áýe reısi Almaty qalasyna aýystyrylady. Qazirgi ýaqytta osy másele boıynsha kelissózder ótip jatyr.
Aıta keteıik, Fınlıandııa Soltústik Eýropa elderi arasynan alǵash bolyp 1991 jyly 30 jeltoqsanda Qazaqstan táýelsizdigin tanyǵan el. Al 1992 jyldyń 13 mamyrynda qos memleket arasynda dıplomatııalyq qarym-qatynas ornady. Eki el arasyndaǵy taýar aınalymynyń kórsetkishi de joǵary deńgeıde. 2014 jylǵy kórsetkish 1,1 mlrd dollardy qurasa, 2015 jyly 467 mln dollarǵa tómendegen. Al ótken jyly bul kórsetkish 342 mln dollar bolypty.
Jıyn barysynda Qazaqstannyń Shvesııa Koroldigindegi elshisi Dastan Eleýkenov sóz alyp, eki memleket arasyndaǵy qarym-qatynastar jaıynda qysqasha baıandap berdi.
– Ár jyldary ekonomıkalyq jaǵdaılarǵa baılanysty saýda aınalymy birde tómendep, birde kóterilip otyrdy. Degenmen, sońǵy ýaqytta bári jaqsaryp keledi. О́tken jyldyń qorytyndysy boıynsha eki el arasyndaǵy saýda aınalymy 311 mln dollardy qurady, – dedi Dastan Eleýkenov.
Ol, sondaı-aq, Qazaqstannyń ıadrolyq qarýǵa baılanysty ustanymyn Shvesııa qoldaıtynyn erekshe atap ótti. Qazaq eline jumys saparymen kelgen Shvesııa Koroldigi parlamentiniń tóraǵasy Ýrban Alın kezinde osy máselemen aınalysqanyn da tilge tıek etti. Sonymen qatar, dıplomat kúzde Elbasy Nursultan Nazarbaevtyń Shvesııa Koroldigine resmı saparmen baratynyn aıtyp, eki el arasyndaǵy baılanys budan da joǵary deńgeıge kóteriletinine senim bildirdi.
Aıan ÁBDÝÁLI, «Egemen Qazaqstan»