«Bir qonaǵymyz bir kúnniń ishinde 5-6 pavılondy kórip úlgeredi. Bizdiń esebimizge sáıkes, osy ýaqytqa deıin kórmeni 26 myńnan astam shetel azamaty tamashalady. Ol barlyq qonaqtardyń 13 paıyzyn quraıdy. Kórmege kelgenderdiń 10 myńnan astamy alty jasqa deıingi balalar bolsa, 2 myńnan astamy – múgedekter men Uly Otan soǵysynyń ardagerleri jáne olarǵa teńestirilgender», degen B.Qarymsaqov sharany tamashalaǵan oqýshylar men stýdentterdiń de qarasy joǵary – 14 myńnan asqanyn aıtty.
Qazirgi dınamıkaǵa kóz júgirtsek, kórmege keletin qonaqtardyń sany kún saıyn artyp keledi eken. Máselen, alǵashqy kúni 17 myń adam qalashyq aýmaǵyn tamashalasa, bul kórsetkish ótken jumada 34 myńnan asqan. Kompanııa basqarýshy dırektorynyń málimetinshe, EKSPO-2017 kórmesine baılanysty osy ýaqytqa deıin 280-nen asa oıyn-saýyq baǵdarlamasy, 50-den asa hattamalyq is-shara uıymdastyrylǵan. Sońǵysyna memleket basshylary, mártebeli meımandar, pavılon komıssarlary jáne túrli dárejedegi delegasııalar qatysqan.
Jıynda Beıbit Qarymsaqov Shymkent qalasynan EKSPO kórmesine kelgen qonaqtardyń bıletteri kórme alańyna kirýge jaramsyz bolyp qalǵandyǵy týraly aqparatqa qatysty túsinikteme berdi. «Jalǵan bılet bolmaı qalǵan joq. Kórmeniń ashylý saltanaty kúninde jalǵan bılettiń 100 nusqasy anyqtaldy. Barlyǵy túrli-tústi kóshirme. Ekinshi kúni de 70 dana jalǵan bılet belgili boldy. Negizi, túpnusqa bıletter Shymkent qalasynda satylǵan. Biz ony arnaıy nómirler arqyly bildik. Sodan keıin túpnusqa bıletterden bazada joq kóshirmeler jasalǵan. Ár bılettiń jeke kody bolatynyn bilgen jón. Búginde jasandy bıletpen kelýshiler joq», dedi kompanııanyń basqarýshy dırektory.
Baspasóz máslıhatynda «Astana EKSPO-2017» UK qoǵammen baılanys departamentiniń dırektory Sergeı Kýıanov álemge áıgili «Foreign Policy» basylymynyń jýrnalısi Djeıms Palmerdiń buǵan deıin daý týdyrǵan maqalasy jaıly áńgimeledi. Onyń aıtýynsha, jurtty shýlatqan tilshi Astanaǵa kelmegen, tipti EKSPO kórmesin aralamaǵan da. «Bizdiń anyqtaǵanymyzdaı, brıtandyq Djeıms Palmer birneshe basylymǵa Ortalyq Azııa elderi men Qytaı týraly jazady eken. Alaıda, EKSPO-2017 kórmesine ondaı jýrnalıst tirkelmegen. Bul – bir. Ekinshiden, Djeıms Palmer esimdi azamat Qazaqstan shekarasynan ótpegen. Iаǵnı kedendik tirkeýde joq. Demek, Palmer myrza óz materıalyn ózge bireýdiń pikirine súıenip nemese arnaıy tapsyryspen jazǵan», dedi S.Kýıanov.
Onyń sózine qaraǵanda, tilshi jazbasynda kóp faktini burmalap kórsetipti. Máselen, ol kórme qurylysyna jumsalǵan qarajatty 5 mlrd dollar dep jazǵan, shyndyǵynda bul – 1,3 mlrd dollar. Muny qurylys jumystaryn júrgizgen kompanııalar da rastaıdy.
Basqosýda ulttyq kompanııanyń kommersıalandyrý jónindegi departamentiniń dırektory Dáýlet Erkimbaev kórme aýmaǵyndaǵy taǵamdar baǵasyn retteý máselesiniń mán-jaıyna toqtaldy. Onyń aıtýynsha, kompanııa basshylyǵy meıramxana, dámxana jáne fast-fýd sııaqty qoǵamdyq tamaqtandyrý oryndaryn ashý arqyly xalyqtyń barlyq toptaryna tıimdi baǵanyń bolǵanyn kózdegen. Máselen, qoǵamdyq tamaqtandyrý dúńgirshekterinde bir túski astyń baǵasy – 1400 teńge. Ol qalanyń ortasha baǵasyna sáıkes keledi. Sebebi, Astanadaǵy oıyn-saýyq ortalyqtarynda da túski astyń baǵasy osyndaı. Al kórme aýmaǵyndaǵy dámxanalar men meıramxanalarda túski astyń ortasha baǵasy – 7500 teńge. Ol da – Astana sııaqty megapolısterdiń ortasha baǵasy.
D.Erkimbaev áleýmettik jelilerde keńinen talqylanǵan «Toıqazan» ulttyq taǵamdar meıramxanasynyń baǵalaryna da túsinik berdi. «Shynymen, ol – qymbat meıramxana. Sebebi, tamaqtyń dámi de, qyzmettiń kórsetý sapasy da joǵary. Negizi, biz bir ulttyq taǵam úshin birneshe oryndy qarastyrdyq. Máselen, meıramxanada qymbat bolsa, fýd-korttarda qazaqtyń ulttyq taǵamdaryn 1-2 myń teńgege satyp alyp jeýge bolady. Sol sııaqty, dúńgirshekterde de qazaqy ettiń bir porsııasyn 1200 teńgege satyp alýǵa múmkindik bar. Sondyqtan qoǵamdyq tamaqtandyrý oryndarynyń baǵasy bir meıramxanaǵa tirelip turǵan joq. Osyny túsiný qajet», dedi departament basshysy.
Mamannyń dereginshe, qalashyq ishinde 25 dámxana men meıramxana jumys isteıdi. Olarda 15 ulttyń taǵamdary ázirlenedi. Budan bólek, fast-fýd ónimderi satylatyn 33 shaǵyn dúńgirshek bar. Sonymen qatar, keıbir ulttyq pavılondar óz ǵımarattarynda tamaqtandyrý oryndaryn ashqan.
E
Ellada ańyzynyń órnegi me, Epostyq jyrym shyqty tórge, mine. Eskortpen tamashaly tań qaldyryp, EKSPO jarqyl qaǵyp keldi elime!
K
Kórmesin ǵajaıyptyń kórdi Astana, Keleshek qýat kózin berdi Astana. Kerim dep tańdaı qaqty nebir jampoz, Kóterdi zeńgir kókke eldi Astana!
S
Saryarqa saıyn tósi dúbirlegen, Samala jaryq kózin bir ilmegen. Samǵaǵan Parıjdegi án Ámire, Sulýym Balqadısha kúlimdegen.
P
Peıili qazaǵymnyń osyndaıda, Paıymy kemeldikke qosylmaı ma? Parasat bıiginen til qatqanda Paraǵy jańa dáýir ashylmaı ma!
O
Ordama alǵys-alqa taǵa keldiń, Osynsha qýanyshty ala keldiń. Ońǵartqan ozyq oıyn orazada Otanym nazarynda bar álemniń!