Bul – Qazaqstan Respýblıkasy Prezıdentiniń 2011 jylǵy 29 maýsymdaǵy №110 Jarlyǵymen bekitilgen «Tilderdi qoldaný men damytýdyń 2011-2020 jyldarǵa arnalǵan memlekettik baǵdarlamasyn» júzege asyrýdyń bir kórinisi.
Polısııa qyzmetkerleriniń memlekettik tildi jetik meńgerý talaby kóp jyldan beri júıeli júrip keledi. Departamenttiń memlekettik til jáne aqparat bólimi mamandary Batys Qazaqstan oblystyq Tilderdi damytý basqarmasynyń qoldaýymen birneshe márte jedeldete oqytý kýrstaryn ótkizgen. Sóıtip, 2013-2014 jyldary BQO IID-niń 200-ge jýyq polısııa qyzmetkeri «Qaztest» júıesi boıynsha synaqty sátti tapsyrdy. 2015 jyly qarasha aıynda ótken dıagnostıkalyq testileýge qatysqan 200-den astam qyzmetkerdiń 80 paıyzy joǵary deńgeıge qol jetkizip, sertıfıkatqa ıe boldy.
Mine, jaqynda Batys Qazaqstan oblystyq Tilderdi damytý basqarmasynyń qoldaýymen Ishki ister departamentinde til úıretý kýrsy jańa topty qabyldady. Sabaqty Mahambet О́temisuly atyndaǵy BQMÝ-diń aǵa oqytýshysy Indıra Sultanııazova júrgizedi. Top quramynda 32 adam oqyp jatyr, onyń 13-i ýkraın, orys, tatar, uıǵyr sekildi ózge etnos ókilderi. Sonymen birge, orys mektebin bitirgen 19 qazaq orta deńgeı baǵdarlamasy boıynsha bilim alýda.
– Bizdiń qyzmetkerler úshin «QazTest» synaǵy bıylǵy jeltoqsan aıynda bolady. Oǵan departament qyzmetkerleriniń 70 paıyzy qamtylady, – deıdi memlekettik til jónindegi maman Jazıra Kenjeeva.
Til sabaqtary suraq-jaýap stılinde oıyn túrinde ótedi. Al jalpysynda Batys Qazaqstan oblystyq Ishki ister departamentinde 158 ózge etnos ókili bar, olardyń 35%-y qazirdiń ózinde memlekettik tilde sóıleı alady.
Qazbek QUTTYMURATULY, «Egemen Qazaqstan»
ORAL