DOXA art grýppasynyń talanatty jigitteri Sergeı Keller men Dmıtrıı Petrovskıı 16 jyldan beri sýret ónerimen aınalysyp keledi. Úlken qalalardaǵy turǵyn úı qabyrǵalaryn ulttyq naqyshta beıneleý arqyly aty shyqqan jigitter at basyn Astanaǵa burypty.
Sergeı Kellerdiń aıtýynsha, beıneleý óneriniń bir salasy mýralızmdi graffıtımen shatastyrýǵa bolmaıdy.
– Mýralızm janry 1920-1960 jyldary Meksıkada paıda bolǵan qozǵalys. Qoǵam kúreskerlerin keń nasıhattaýǵa umtylǵan, ómir shyndyǵyn revolıýsııalyq damý turǵysynan beıneleýdi maqsat etken sýretshiler jańa baǵytty týdyrdy. Al graffıtıde qalaǵan keskinińnen bastap, kez-kelgen sózdi jazýǵa bolady. Mýralızmniń túp negizinde ulttyq, patrıottyq rýh jatyr, –deıdi Sergeı Keller.
Sýretshiniń sózinshe, tutas qabyrǵany keskindeýge tórt kúndeı ýaqyt ketken. 40 lıtr boıaý jumsalǵan.
– Bul kartına Selınograd kezinde pochta markalaryna jıi shyqqan tarıhı sýret. Joba aldaǵy ýaqytta jalǵasyn tabady, – deıdi Astana qalasy ákimdiginiń baspasóz qyzmetiniń jetekshisi Elvıra Júrgenbaeva. Onyń aıtýynsha, Astanadaǵy taǵy osyndaı on turǵyn úıdiń syrtyn bezendirý josparlanyp otyr.
Aıa О́MIRTAI,
"Egemen Qazaqstan"