Onyń aıtýynsha, dollarlandyrýdyń joǵary kórsetkishteri ekinshi deńgeıli bankterdiń ǵana emes Ulttyq banktiń de jumysyna keri áser etedi. Alaıda, bul keri áser etý yqpalyn birneshe tásildermen azaıtýǵa bolady. Ol úshin aınalymnan dollardy alyp tastaý sııaqty qadamdarǵa barýdyń keregi joq.
«Ekonomıkany dollarlandyrý - úlken problema. Bul QR Ulttyq bankiniń jumysyna kedergi keltiredi. О́ıtkeni, bas bank ulttyq valıýtanyń emıtenti bolyp esepteledi. 2016 jyly eldegi dollarlandyrý kórsetkishi 80%-dy qurady, jeke tulǵalardyń depozıtteriniń barlyǵy sheteldik valıýtada boldy. Osyndaı jaǵdaıda bankter jumys isteı almaıdy. О́ıtkeni olarda teńge bolmady. Ortalyq bank durys aqsha nesıe saıasatyn júrgize almady. Sebebi, biz teńge naryǵyndaǵy stavkalardy paıdalanamyz. Al bankterde tek dollar», dedi D. Aqyshev.
Bas bankır teńge depozıtteriniń kólemin arttyrý úshin qandaı qadam jasalǵanyn aıtyp ótti.
«Dollarlandyrý prosesin bastan ótkerý kerek. Muny naryqtyq tetiktermen jasaýǵa bolady. Árıne, ákimshilik quraldar da bar. Biraq dollarmen aqsha jııýǵa tikeleı tyıym salý Qazaqstanda múmkin emes. Sondyqtan teńge depozıtteriniń stavkasyn kóterip, dollar depozıtteriniń stavkalaryn azaıttyq. Qazirgi tańda jeke tulǵalar, kásiporyndar men uıymdar aktıvterin teńgege aýystyra bastady. Taldaý qorytyndysyna sáıkes, sońǵy 15 aıda dollar baǵamy tómendedi», dedi ol.
Aıta keteıik, 2015 jyly Qazaqstanda ekonomıkadaǵy dollarlandyrý deńgeıin tómendetý boıynsha jospar qabyldanǵan bolatyn. Bul jospar QR Úkimetiniń otyrysynda, Ulttyq bank basqarmasynyń otyrysynda maquldandy. Josparǵa makroekonomıkalyq turaqtylyqty qamtamasyz etý, qarajattyń kóleńkeli aınalymyn qysqartý men naqty aqshasyz tólem kólemin damytý, ulttyq valıýtanyń basymdyǵyn arttyrý sııaqty 3 negizgi strategııalyq baǵyt engen bolatyn.
2017 jyldyń sáýiriniń sońynda ulttyq valıýtadaǵy depozıtter kólemi 9 090,2 mlrd teńgege jetken (1 aıda 2,6%-ǵa ósken), sheteldik valıýtadaǵy depozıt kólemi 1 aıda 1,4%-ǵa azaıyp, 8 654,7 mlrd teńge boldy.
Osymen ekinshi aı boıy ulttyq valıýtadaǵy depozıtter kólemi sheteldik valıýtadaǵy depozıtter kóleminen artyq bolyp otyr. Dollarlandyrý kólemi 49,8%-dan 48,8%-ǵa deıin tómendedi. Zańdy tulǵalardyń ulttyq valıýtadaǵy depozıtteri 2017 jyly sáýirde 0,6%-ǵa artyp, 5 752,5 mlrd teńgeni qurady. Sheteldik valıýtadaǵy depozıt kólemi 0,3%-ǵa tómendep, 4 415,9 mlrd teńgege jetti.