Tańdaýlylarǵa erekshe qurmet kórsetilmegi zańdy. 2017 jylǵy Jetisý óńiriniń eń ozat túlekteri altyn belgini oblys ákiminiń qolynan aldy. Almaty oblysynda bıyl 14268 oqýshy mektep bitirdi. Sonyń 590-y – altyn belgi ıegeri. Úzdik attestat – 523 oqýshyǵa buıyrǵan. Bul kórsetkishke óńir basshysynyń kóńili tolady. Aıtýyna qaraǵanda, sońǵy jyldary oblys kóleminde ozat oqýshylardyń sany artyp keledi. Bul – bilim sapasy artqanynyń kórsetkishi. Respýblıkalyq, Halyqaralyq bilim saıystarynda top jaryp, júlde salǵan oqýshylar da az emes. Bul rette ustazdardyń da eńbegin, biliktiligin aıta ketken jón. Jıynda úzdik oqytýshylardyń da aty erekshe atalyp, qurmet kórsetildi.
Oblys ákimi Amandyq Batalov quttyqtaý sózinde:
Búgin sizder úshin de, ata-analar men ustazdar úshin de tolqynysty sát. Qımas meken, altyn uıaǵa aınalǵan mekteptegi alańsyz kúnder aıaqtalyp, azamattyq jaýapkershiligi mol kezeńge aıaq bastyńyzdar. Mektep qabyrǵasynda alǵan bilimderińiz bul jolda senimdi serik bolady dep senemin. Sizderden álem órkenıetine jaqyn, ozyq oıly jastar retinde úlken úmit kútemiz, – dedi.
Ras, mektepti altynmen bitirý – «maqtanyshpen qatar úlken mindetter de júkteıdi». Taldyqorǵandaǵy «Jastar» saıabaǵyn saltanatqa bólegen 590 túlek ózderine kórsetilgen erekshe qurmettiń artynda osyndaı salmaqtyń jatqanyn da sezinetinderin aıtty. Kóp shákirrtiń atynan sóz alǵan Taldyqorǵan qalasyndaǵy daryndy balalarǵa arnalǵan úsh tilde oqytatyn №20 arnaýly lıseıiniń túlegi Asyljan Balatursynov júrekjardy sózin úsh tilde erkin jetkizdi:
«Biz azat elde týyp-ósip, bilim alǵanymyzdy maqtan tutamyz. Sonymen qatar, jastardan úlken úmit kútetin jurtymyz ben Elbasy senimin aqtaıtyn azamat bolatynymyzǵa sóz beremiz», dedi.
Jıyn sońy – dástúrli túrde qoshtasý valsimen túıindelip, elge belgili óner ıeleriniń qatysýymen ótken konsertpen jalǵasty.
Almas NÚSIP, «Egemen Qazaqstan»