Fınder «Álemdegi eń jasyl el – bizdiń memleket» dep maqtanyshpen aıtady. Ony moıyndamasqa bolmaıdy. El aýmaǵynyń 70%-yn orman alqaptary alyp jatyr. Sondyqtan aýqymdy pavılonnyń aǵashtan salynýy zańdylyq. Biletinderdiń aıtýynsha, qurylysqa 600 tonna qaraǵaı paıdalanylǵan. Taǵy bir erekshelik, qabyrǵalary arnaıy boıaýmen syrlanyp, múkpen kómkerilgen. Onyń da ózindik sebebi bar. Múk aýany tazartyp, ottegimen qorektendiredi eken.
Al endi pavılonǵa keletin bolsaq, ol tórt aýmaqqa bólingen. Taza energııa, taza sý, aqyldy qala jáne bilikti bilim berý degen ataýǵa ıe, árqaısysy jeke-jeke taqyryptardy kóteredi. Jalpy Fınlıandııa – jańartylǵan energııa kózderin qoldanýda Eýropada kóshbasshy elderdiń biri. Sondyqtan jurtty tańqaldyratyndaı, qyzyqtyratyndaı dúnıeleri az emes. Ásirese aqyldy qala ataǵyna ıe Oýlý qalasynyń tájirıbesi kópshilikti qyzyqtyrary anyq.
Pavılonnyń ashylý saltanatynda fınder jasyl ekonomıkadaǵy jetistikterimen ǵana emes, ulttyq dástúr, mádenıetin de barynsha kórsetip baqty. Kórme qonaqtary Laplandııa eldi mekeninen kelgen Santa-Klaýspen kezdesý múmkindigine ıe boldy. Sondaı-aq Fınlıandııanyń tanymal óner juldyzdarynyń ónerin tamshalady.