Dáýren Abaev mınıstrlik otandyq aqparat quraldarynyń halyq úshin tartymdylyǵyn arttyrý jumysyn júıeli júrgizip jatqanyn atap ótti.
«Sonyń ishinde memlekettik telearnalar boıynsha úlken sharalar júzege asyp, teleónimderdiń sapasy artty. Atap aıtqanda, «Kazakh TV» men «Bilim jáne mádenıet» telearnalary «Kazakh TV» ataýymen biriktirildi. Telearna kontentiniń eldegi jáne sheteldegi kórermenderdiń qyzyǵýshylyǵyna saı kelýine múmkindik berildi. Formaty ózgerip, jańa arnaǵa aınalǵan «Habar 24» mańyzdy aqparattardy qalyń kórermenge jedel ári sapaly jetkizýde", dedi mınıstr. Sondaı-aq Dáýren Abaev «Qazaqstan» men «Habar» telearnalarynda da mazmundy ózgertýler júrgizilip, telearnalar taldaý formatyna kóshkenin atap ótti. "О́tken jyly «Qazaqstan» men «Habar» telearnalary 16 serıal túsirdi, olardyń arasynda «Áke», «Anaǵa ińkár júrek», «Aqyldyń kilti» sııaqty sátti jobalar bar. Birqatar otandyq serıaldy kórshi memleketter de tamashalaýda. Bıylǵy jyldan bastap «Otaý TV» spýtnıktik operatordyń paketine «Qazaqstan» jáne «Qazsport» telearnalary ND formatynda kórsete bastady", dedi mınıstr.
Baıandama barysynda Dáýren Abaev osy jyldyń naýryz aıynda altyn qorymyzdaǵy otandyq fılmderdi kórsetetin «El arna» atty jańa arna iske qosylǵanyn atap ótti. Onyń aıtýynsha, telearnalarymyzǵa halyqtyń qyzyǵýshylyǵy burynǵydan qaraǵanda arta túsýde. Sondaı-aq mınıstr Qazaqstannyń birqatar óńirinde Qazaq radıosy, Shalqar radıosy tolyq ustamaıtynyn aıtyp, osy jyldyń sońyna deıin bul olqylyqtyń ornyn toltyrý úshin qajetti jumystar atqarylatynyn aıtty.
Gúlnur Qýanyshbekqyzy,
"Egemen Qazaqstan"
Sýretti túsirgen Erlan Omarov,
"Egemen Qazaqstan"