Keshe osyndaǵy agrarly tehnıkalyq kolledjdi bitirip shyqqan 22 túlekke dıplom tapsyrý saltanatty ótti. Saltanatty shara bastalmas buryn Astanadan Bilim jáne ǵylym mınıstrliginen, «Halyqaralyq baǵdarlamalar ortalyǵy» AQ «Serpin» ulttyq jobalar basqarmasynan, Aqparat jáne kommýnıkasııalar mınıstrliginen arnaıy kelgen qonaqtar respýblıkalyq jáne jergilikti BAQ ókilderimen birge pres-týr aıasynda «Qazsınk» JShS Rıdder metallýrgııalyq kesheni men Rıdder agrarlyq kolledjin aralap, tynys-tirshiligimen tanysty. Bul eki nysannyń da serpindikterge tikeleı qatysy bar. Jıyrma eki stýdent kolledjde úsh jyl boıy bilim nárimen sýsyndasa, sonyń 7-ýi 8 aı Rıdder metallýrgııalyq kesheninde óndiristik tájirıbeden ótip, qazirgi ýaqytta osynda jumysqa qabyldanyp otyr.
Búginde tehnık-metallýrg mamandyǵy boıynsha atalǵan keshende eńbek etip jatqan Almaty oblysynyń týmasy Mıras Qaıdarov Rıdderdegi úsh jyldyń qyzyqty ótkenin, ózderine barlyq jaǵdaıdyń jasalǵanyn aıtady. «Qala halqy bizdi qushaq jaıa qarsy aldy. Kolledjdegi ustazdarymyzǵa, shahar basshylyǵyna úlken alǵys aıtamyz. Qazir metallýrgııalyq keshende óz qatarlastarymmen birge jumys istep jatyrmyn», - deıdi ol. Mırastyń qatarlastarynyń biri Ońtústik Qazaqstan oblysynyń Shymkent qalasynan kelgen Ǵalymjan Begaly: «Biz munda eń aldymen tájirıbeden óttik, tájirıbe kezinde árqaısymyzǵa qoldaý retinde 90 myńnan bastap 110 myń teńgege deıin aqsha tólendi. Árıne, áýelde til jaǵynan azdaǵan qıyndyqtar boldy. Biraq osyndaǵy qyzmetkerler túsinistikpen qarap, bilgenderin úıretti. Ujymymyz jaqsy. «Qazsınk» sekildi alpaýyt kásiporynda eńbek etip jatqanymyzǵa qýanyshtymyz» dep aǵynan jaryldy. Tegin jataqhanamen, úsh mezgil tamaqpen qamtamasyz etilgen jastar áýelde aýa-raıynyń sýyqtyǵynan seskengenimen, baǵdarlama aıasynda olarǵa qys mezgilinde jyly kıimder berilipti.
Elordadan kelgen qonaqtar men jýrnalıster jyly jaqtyń uldary men qyzdary bilim alǵan kolledjdi asyqpaı aralaǵannan keıin «Shyǵys Qazaqstan oblysynyń Rıdder qalasynda «Máńgilik el jastary – ındýstrııaǵa!» áleýmettik jobasynyń «Serpin» damytý baǵdarlamasyn engizý bolashaǵy» taqyrybynda ótken dóńgelek ústelge qatysty. Dóńgelek ústeldi ashqan Rıdder qalasy ákiminiń orynbasary Danııar Dúısembaev kolledjdi bitirgen 22 túlektiń biri joǵary oqý ornyna túsetinin, biri ásker qataryna alynatynyn aıtyp, «Qazsınk» kompanııasyna qarasty Rıdder metallýrgııalyq kesheni taǵy da 7 stýdentti (7 stýdenttiń jumysqa qabyldanǵanyn joǵaryda aıttyq) jumyspen qamtýǵa nıetti ekenin jetkizdi. Sonymen qatar qazirgi ýaqytta qalǵan 6 qyz balaǵa jumys izdestirilip jatqanyn, bul másele jýyq arada sheshimin tabatynyn tilge tıek etti.
Rıdderde bilim alǵan 22 stýdenttiń aldy otbasyn quryp ta úlgeripti. Sonyń biri – Almaty oblysynan kelgen stýdent Eldan Bolatuly. Onyń jubaıy Krıstına da osy kolledjde ormanshy mamandyǵy boıynsha bilim alypty. «2014 jyly osynda oqýǵa tústim. Bolashaq jubaıymmen sol jyly tanysyp, bir jarym jyldan keıin otbasyn qurdyq. Kishkentaıly boldyq. Alla sátin salsa, osy qalada eńbek etsem degen oıym bar», - deıdi jetisýlyq stýdent.
Serpindikterdiń arasynda kóńil jarastyryp, otbasyn qurǵan jastardyń qatary az emes. Buǵan deıin 16 bozbala men boıjetken shańyraq kóteripti. «Bul - bizdiń 17-inshi nemere», - deıdi «Halyqaralyq baǵdarlamalar ortalyǵy» AQ «Serpin» ulttyq jobalar basqarmasynyń basshysy Kúlzııa Tobataeva.
Rıdder agrarly tehnıkalyq kolledjinde ótken shara barysynda «Serpin» ulttyq jobalar basqarmasynyń basshysy 8 stýdentke qyzyl dıplom jáne birqatar stýdentterge Bilim jáne ǵylym mınıstri Erlan Saǵadıevtiń alǵys hatyn tapsyrdy. Mundaı alǵys hat osy istiń basy-qasynda júrgen Rıdder qalasynyń ákimi Jomart Muratovqa, onyń orynbasary Danııar Dúısembaevqa, Rıdder agrarly tehnıkalyq kolledjiniń dırektory Aleksandr Samoılenko men oblystyq Ishki saıasat basqarmasynyń «Jastar resýrstyq ortalyǵynyń» dırektory Araılym Esimbekovaǵa da tabys etildi.
Azamat QASYM,
«Egemen Qazaqstan»
Shyǵys Qazaqstan oblysy,
Rıdder qalasy