Mundaǵy oqýshylardyń jyl boıy demalý lageri Aqtóbe oblysynyń ákimi Berdibek Saparbaevtyń bastamasymen ári tikeleı qoldaýymen ótken jyly qazan aıynda qurylǵan. Ári oǵan «Ásem» degen aıtýǵa da, jazýǵa da óte yńǵaıly, án sózindeı estiletin tamasha ataý berilgen. Elimizde eshqandaı balamasy joq jarqyn joba memleket-jekemenshik áriptestik aıasynda iske qosylǵan. Onyń basty bazalyq tiregi oblystaǵy «Aqtóbe-Shyǵys» lageri bolyp tabylady. Bir aýysymda munda demalatyn ýaqyt 12 kúnge eseptelgen. Ári osy bir aýysym aralyǵynda «Ásem» 115 jetkinshekti qabyldaı alady. Olardyń qataryn halyqaralyq jáne respýblıkalyq olımpıadalarda kósh basynan kóringender quraıdy. Ǵylymı jáne sporttyq jarystarda top jarǵandar da osy lekte. Shyǵarmashylyq konkýrstardyń jeńimpazdaryn da osy toptan tabasyz. Qysqasy «Ásemde» bıylǵy jyldyń sońyna deıin 3220 bala demalady dep kútilýde. Osy oraıda onyń qyzmeti keshendi kózqaraspen ushtasyp jatqanyn aıtqan jón. Iаǵnı, lagerdiń uıymdastyrý jumystary tek demalyspen shektelmeıdi. Sonymen qatar kelýshilerdiń jalpy bilim berý pánderi boıynsha bilimderin tereńdetýge de tolyq múmkindikteri bar. Jyl boıy jumys jasaıtyn lagerge «Symbat» jekemenshik mektebi de áriptes retinde iske kirisken. Buǵan qosa «Ásemde» oqýshylardyń jan-jaqty úılesimdi túrde demalýyna da barlyq jaǵdaı týǵyzylǵan.
Oqýshylar demalatyn lagerler jazǵy kanıkýl kezderinde maýsymdyq sıpatta uıymdastyrylatyny belgili. Buǵan kóz de úırengen. Kóńil de ornyqqan. Al buǵan deıin elimizde jas jetkinshekterge arnalǵan tutas jyl boıy demalý lageri bolyp kórmegenine de bás tigýge de bolady. Osyndaı alǵashqy qadam Aqtóbe aımaǵynan bastaý alyp otyr.