«Grafen grafıtti shegine deıin óńdeý arqyly alyndy. Ol álemdegi eń jińishke, berik ári jeńil materıal. Onyń jýandyǵy bir atomdy ǵana quraıdy. Sondaı-aq, bolattan 200 ese qatty. Qazirgi tańda grafen basqa materıaldarmen birigip qoldanylady», dedi pavılon komıssarynyń orynbasary Sara Everet. Ol sóz oraıynda Ulybrıtanııanyń qazaq elin qandaı jobamen tańǵaldyrýdy josparlap otyrǵanyn aıtty. «Biz grafennen jasalǵan elektr shamdaryn alyp keldik. Shamdaǵy volframnyń symy grafenge almastyrylǵan. Bul elektr energııasyn únemdeýge múmkindik beredi. Sondaı-aq, sham qatty qyzbaıdy. Tipti, ony qolmen ustap kórýge bolady. Bul shamdardy turmysta 8 jyl qoldana alasyz. Onyń naryqtaǵy quny – 10 eýro. Aldaǵy ýaqytta baǵa budan da tómen bolýy múmkin», degen pavılon ókili grafen materıalyn basqa da maqsatta paıdalanýǵa bolatynyn jetkizdi. «Aldaǵy ýaqytta grafen sý men aýany tazalaýda qoldanylýy múmkin. Arnaıy grafennen jasalǵan tútikshe arqyly tuzdy sýdy ishe berýge bolady. Iаǵnı, tútikshe sýdy tuzdan tolyǵymen tazartady. Endi aýany tazalaýǵa toqtalsam, las aýa arnaıy grafen súzgisinen ótedi. Nátıjesinde, aýadaǵy kómirqyshqyl gazy grafendegi fıltrde qalady. Al kómirqyshqyl gazyn basqa da maqsattarǵa paıdalanýǵa bolady. Bul jobalar boıynsha áli jumystar júrgizilýde. Grafen materıalyna qatysty jobalarmen Manchester ýnıversıteti aınalysady», dedi komıssardyń orynbasary.
Toptamany ázirlegen Ashat RAIQUL, «Egemen Qazaqstan»
Sýretterdi túsirgen Orynbaı BALMURAT, «Egemen Qazaqstan»